Туркије: Бројот на загинати во експлозијата во рудникот во Бартин порасна на 40

БАРТИН (АА) – Бројот на рудари кои загинаа во експлозијата во рудникот за јаглен во северна Туркије се зголеми на 40, соопшти турскиот министер за внатрешни работи Сулејман Сојлу, јавува Агенција Анадолија (АА).

Сојлу рече дека 11 повредени рудари се на лекување во болниците.

„Еден од повредените е отпуштен“, изјави Сојлу за новинарите во Амасра, во областа Бартин, каде што десетици рудари беа заробени под земја од околу 18:15 часот по локално време вчера.

Истакнувајќи дека 58 од 110 рудари се спасени, тој рече дека постои неизвесност за еден од рударите, додавајќи дека во моментов сè уште траат акциите за пребарување и спасување.

Министерот за енергетика и природни ресурси Фатих Донмез изјави дека пожарот што избувна во галеријата на рудникот по експлозијата во голема мера е под контрола.

Турскиот претседател Реџеп Таип Ердоган внимателно ја следи ситуацијата, напиша турското Претседателство на Твитер.

Тој го откажа планираното патување во југоисточната турска област Дијарбакир и наместо тоа ќе отпатува за Амасра.

Ердоган во твит рече дека операциите за пребарување и спасување во рудникот напредуваат брзо.