Ekipa
10 Април 2021•Ажурирај: 11 Април 2021
СКОПЈЕ (АА) - Турција започна со целосна вакцинација на вработените во туристичкиот сектор во земјата, пренесува Агенција Анадолија (АА).
Вакцинацијата се спроведува во координација на Министерството за култура и туризам, Министерството за здравство и Агенцијата за промоција и развој на туризмот на Турција (TGA).
Од Агенцијата соопштија дека програмата за вакцинација ги опфаќа вработените во авиокомпаниите, аеродромите, сместувачките капацитети, туристичките агенции, како и професионалните водичи.
Вакцинацијата на целиот персонал во туристичкиот сектор планирано е да заврши пред почетокот на летната сезона 2021.
„Во рамките на „Програмата за сертифицирање на безбеден туризам“, вакцинацијата има за цел да им посака добредојде на туристите од странство за претстојната летна сезона и да го осигури здравјето и безбедноста на вработените во туристичкиот сектор, како и на жителите“, порачаа од Агенцијата за промоција и развој на туризмот на Турција.
Како дел од континуираните напори за борба против Ковид-19 и понатамошно зајакнување на позицијата како една од најбезбедните дестинации во светот, Турција продолжува да инвестира во „Програмата за сертифицирање на безбеден туризам“ што е еден од првите и најуспешни примери во светот на ова поле.
Од Агенцијата истакнаа дека Турција го прошири опсегот на сертифицирање и ја направи задолжителна сертификацијата на сместувачките капацитети со 30 или повеќе соби, и дека досега се сертифицирани над 8.000 објекти.
„Бидејќи Турција очекува повторен раст на туристичките патувања (во форма на буквата V), вакцинацијата на работната сила од туристичкиот сектор е приоритет“, се вели од Агенцијата.
Оттаму порачуваат дека Турција ги презема сите активности за да се осигури дека останува здрава и безбедна туристичка дестинација во 2021 година, и да биде еден од првите избори како безбедна опција за патување на странските туристи.
Турција, поради пандемијата на коронавирусот во светот, ја воведе „Програмата за сертификација за безбеден туризам“ за туристичката сезона 2020. Програмата вклучува низа мерки што мора да се преземат низ огромен спектар на поврзани елементи, вклучувајќи ја храната и пијалаците, транспортот и сместувачките капацитети за да се осигури здравјето и благосостојбата на персоналот и на гостите, домашни и странски.
