АНКАРА (АА) - Речиси половина од сите смртни случаи кај децата под петгодишна возраст се предизвикани од глад, предупреди денес првата дама на Турција, Емине Ердоган, повикувајќи на глобална акција за намалување на фрлањето храна на четвртата годишнина од Меѓународниот ден на нула отпад, јавува Анадолу.

Во видеопорака објавена на американската платформа за социјални медиуми Х, по повод 30 март, денот кој е прогласен за Меѓународен ден на нула отпад од страна на Генералното собрание на ОН во 2022 година под водство на Турција, Ердоган ги истакна хуманитарните и еколошките последици од фрлањето храна и повика на поголема свест и промена во однесувањето.

Таа истакна дека спасувањето на само една четвртина од храната што се фрла на глобално ниво би можело да биде доволно за искоренување на гладот, посочувајќи дека 673 милиони луѓе се соочуваат со глад, а над две милијарди луѓе немаат пристап до соодветна и балансирана исхрана.

„Овогодишната тема е посветена на 'фрлањето храна'“, рече таа, посочувајќи дека 673 милиони луѓе низ светот се борат со глад, повеќе од две милијарди немаат соодветна и балансирана исхрана, а секој дванаесетти човек живее под ризик од хроничен глад.

„Сакаме да ја препознаеме верижната реакција што стои зад секое парче фрлена храна и колективно да му кажеме 'стоп' на овој тренд“, додаде таа.

Емине Ердоган, исто така, истакна дека годишно се губат или фрлаат околу 2,3 милијарди тони храна, која е еквивалентна на 5,8 билиони оброци, потенцирајќи дека „секој фрлен залак ги носи правата на оние чии животи зависат од него”.

„За жал, речиси половина од смртните случаи на децата под петгодишна возраст се предизвикани од глад”, изјави таа. „Сепак, доколку би можеле да спасиме само една четвртина од храната што се фрла на глобално ниво, би можеле да му ставиме крај на гладот во светот.“

Таа додаде дека загубите и фрлањето храна генерираат од 8 до 10 отсто од вкупните глобални емисии на стакленички гасови, со што дополнително се зголемува притисокот врз животната средина и климата.

Цитирајќи го извештајот за индексот на фрлена храна, Ердоган вели дека дури 60 отсто од фрлената храна се создава на ниво на домаќинствата, нагласувајќи дека едноставните промени во однесувањето би можеле да придонесат за значително намалување на отпадот.

„Искуството ни покажува дека трансформацијата во однесувањето е една од најефективните еколошки и климатски политики“, рече Ердоган, осврнувајќи се на турскиот проект „Нула отпад“, започнат во 2017 година.

„Дури и со тоа што ќе спречиме само едно овошје да се расипе, можеме да ги заштедиме водата, енергијата и трудот вложени за негово производство”, рече таа, повикувајќи ги луѓето да ги претворат кујните во места на почит кон ресурсите, наместо во центри на отпад.

Ердоган повика на колективна акција за градење на „праведен свет во кој ниедно дете нема да гладува”.