ИСТАНБУЛ (АА) - Обилни снежни врнежи го зафатија најголемиот турски град Истанбул, предизвикувајќи затворање на трговските центри, прекин на сообраќајот и затворање на аеродромот, јавува Агенција Анадолија (АА).

Обилните снежни врнежи предизвикаа сообраќаен метеж во населбите како Зејтинбурну, Бахчелиевлер, Сариер и Кагитане на европската страна на градот.

Некои патници како и возила останаа заглавени поради обилниот снег.

Во Пендик на азиската страна на градот, противпожарно возило кое се обидувало да спаси возило се заглавило на самиот пат.

Повеќето училишта се веќе затворени поради распустот кој трае две недели.

Градската општина Истанбул соопшти дека 1.300 бездомници добиле засолниште од студеното време во разни згради и хотели.

„Секој ден општината дистрибуира и повеќе од два тона храна на 500 локации за бездомните животни“, се додава во соопштението на Општината.

Гувернерот на Истанбул, Али Јерликаја, изјави дека поради обилните снежни врнежи, рутите од северозападна Турција до Истанбул се затворени до понатамошно известување.

Јерликаја најави и дека трговските центри во градот ќе затворат во 19:30 часот по локално време.

Главниот турски Меѓународен аеродром „Истанбул“, исто така, беше затворен за летови поради снежните врнежи.