КАСТАМОНУ (АА) – Гробница стара речиси 2.100 години во северна Турција е отворена за посетителите по спасувачките ископувања, соопштија локалните власти, јавува Анадолу.
Сместена во Каји, село во округот Дадај во покраината Кастамону, могилата се смета за една од најважните погребни структури од античкиот регион Пафлагонија.
Локалитетот уште во 1998 година бил регистриран како археолошко наоѓалиште од прв степен, но со години бил изложен на нелегални ископувања и оштетувања.
Во периодот од 2015 до 2017 година, Министерството за култура и туризам на Турција спроведе спасувачки ископувања, при што масивните камени блокови околу погребната комора биле повторно поставени, со што споменикот бил доведен во состојба погодна за посета.
Забележувајќи ја неговата важност како културно богатство за регионот, локалните власти и жителите го истакнуваат неговиот потенцијал со поголема меѓународна промоција.
Челникот на селото Каји, Ибрахим Терзи, рече дека локалитетот има голема вредност за културното наследство на регионот.
„Сакаме светот да слушне за ова место и тоа да биде отворено за туризам како папфлагонска некропола“, рече Терзи.
Фотографот на природа Џебраил Келеш, исто така, ја истакна историската важност на тумулот, наведувајќи дека тој носи јасни траги од напредна древна цивилизација.
„Од остатоците што се зачувани може да се види дека овде постоела високо развиена цивилизација пред повеќе од две илјади години“, изјави Келеш, нагласувајќи ја потребата од промоција на локалитетот пред меѓународната публика заинтересирана за историја и археологија.
