Министрите за одбрана и шефовите на разузнавањето на Туркије, Русија, Сирија и Иран ќе се состанат во Москва

АНКАРА (АА) - Турскиот министер за национална одбрана, Хулуси Акар, денес изјави дека во Москва утре ќе се одржи состанок на министрите за одбрана и шефовите на разузнавачките служби на Туркије, Русија, Сирија и Иран, јавува Анадолу.

Акар потсети дека министрите за одбрана и шефовите на разузнавањето на Туркије, Русија и Сирија се состанале во Москва на 28 декември минатата година и решиле да продолжат со состаноците.

„Подоцна беа разменети мислења за учеството на Иран на овие состаноци. Ова беше одобрено од надлежните органи. Како продолжение на таа седница, овојпат како квартет, се подготвуваме за состанок на кој ќе присуствуваат министрите за одбрана и шефовите на разузнавањето“, рече Акар.

„На 25 април оваа средба треба да се одржи во Москва. Нашата цел е да ги решиме проблемите преку преговори и да донесеме мир и спокојство во регионот што е можно поскоро.“

Акар изјави дека се очекуваат неколку позитивни чекори по средбите.

Тој додаде дека Туркије е одлучна во борбата против тероризмот и има за цел да обезбеди Сиријците што се во Туркије да се вратат доброволно, безбедно и достоинствено во својата земја.

„Имаме сириски браќа и сестри со кои сме заедно, без разлика дали се тие во Туркије или Сирија. Не доаѓа предвид да донесеме каква било одлука што ќе ги доведе во неволја“, рече шефот на турската одбрана.