Mümin Altaş
21 Декември 2021•Ажурирај: 22 Декември 2021
АНКАРА (АА) - Турскиот претседател Реџеп Таип Ердоган најави нова финансиска алтернатива за турските граѓани за да ја ублажат грижата во врска со движењата на девизниот курс, јавува Агенција Анадолија (АА).
На прес-конференцијата по состанокот на Кабинетот во Претседателскиот комплекс во Анкара, Ердоган најави низа нови мерки кои се однесуваат на движењето на курсот на турската лира. Порача дека продолжуваат да го исполнуваат своето ветување во рамките на кое нема да дозволат работниците да бидат изложени на високи трошоци за живот.
„Нема да дозволиме да се преземат чекори кои ќе ги запрат инвестициите, ќе ја намалат вработеноста, ќе го намалат производството и ќе го спречат извозот во нашата земја“, рече Ердоган, додавајќи дека „Турција нуди нова финансиска алтернатива за граѓаните кои сакаат да ја ублажат загриженоста поради растот на девизниот курс.
Нагласи и дека „ниту еден турски државјанин нема да мора да ги префрла своите заштеди од турски лири во странска валута“, бидејќи „курсот ќе биде повисок“.
Ердоган соопшти и дека извозниците во Турција кои имаат потешкотии при одредување на цените поради девизниот курс, преку Централната банка ќе бидат информирани за движењето на курсот.
„Свесни сме за подмолноста на оние кои се обидуваат да забијат нож во грбот на својата земја и нација со отворање на расправи како девизниот режим“, порача Ердоган.
Ердоган најави развој на нови алатки за придонес во турската економија со 5.000 тони злато, во вредност од 280 милијарди долари, кое се наоѓа во приватна сопственост.
Најави и „нова алатка која ќе овозможи евентуална девизна добивка со задржување на средствата во домашна валута.“
Турскиот претседател повтори дека нема да се откаже од намалувањето на каматните стапки.
„Заедно со намалувањето на каматните стапки сите заедно ќе видиме како инфлацијата за неколку месеци ќе почне да опаѓа“, порача Ердоган.
„Турција нема ниту намера, ниту потреба да направи ни најмал чекор назад од слободната пазарна економија и девизниот режим.“
Нагласи дека Турција повеќе нема да биде земја која својата економија и политика ја дава да бидат хипотека преку програмите на ММФ.
Ердоган најави и зголемување на стипендиите во Турција следната година, за студентите на 850 турски лири, за постдипломските студии 1.700 лири, и за докторантите на 2.550 лири.
Истакна дека се борат Турција да ја доведат меѓу 10-те најдобри економии во светот, односно на врвот на глобалната развојна лига.
„Ја зголемивме трговијата со Африка од 5,4 на 30 милијарди долари во првите 11 месеци од оваа година. Нашата цел сега е да ја поместиме нашата трговија на 50 милијарди долари, а потоа на 75 милијарди долари“, рече Ердоган.
