АНКАРА
Патот на Турција кон пристапување во Европската унија треба да се подобри, изјави високиот дипломат на Анкара задолжен за односите со блокот, јавува Агенција Анадолија (АА).
„Перспективата за пристапување на Турција во ЕУ треба да се заштити и зајакне“, рече заменик-министерот за надворешни работи на Турција Фарук Кајмакчи во интервју за бриселското списание „Дипломатик Ворлд“, објавено во понеделникот.
„Нема потреба да се бараат нови идеи за да се продолжи со пристапувањето на земјата во ЕУ“, додаде тој.
„Веќе ја имаме структурата: Изјавата од 18 март 2016 година [договорот за мигрантите] со сите шест димензии“, рече Кајмакчи, притоа наведувајќи ги преговорите за пристап како прва димензија.
„За жал, нашите преговори за пристапување во ЕУ се доведени во застој поради некои политички прашања, иако тоа е главно технички процес. Следствено, нашите пристапни преговори не напредуваа толку брзо како што сакавме, Но ние сè уште сме земја-кандидат за преговори“, рече Кајмакчи.
Велејќи дека „колку повеќе Турција верува дека ќе стане членка на ЕУ, толку побрзо ќе се случат реформите во Турција и ќе бидат подобри односите меѓу Турција и ЕУ“, Кајмакчи нагласи: „Доколку Турција се чувствува дискриминирана меѓу земјите кандидати или оттурната од остатокот од Европа, тогаш ќе имаме сѐ помалку доверба еден кон друг, а тоа не е од помош“.
Тој истакна дека процесот на пристапување мора да се ревитализира без никакви предрасуди.
Наведувајќи ги состаноците за дијалогот на високо ниво меѓу Турција и ЕУ како втора димензија, Кајмакчи продолжи со зборовите: „Веќе воспоставивме состаноци за дијалог на високо ниво меѓу турските министри и европските комесари за економија, енергија, транспорт и надворешна политика. Сепак, тие се прекинати од страна на ЕУ“.
Кајмакчи ја изрази подготвеноста на Турција „да ги одржи сите овие состаноци за дијалог на високо ниво, и новите и старите, но и да ги ревитализира веќе воспоставените механизми меѓу Турција и ЕУ, како што се состаноците на Советот за асоцијација и состаноците на политичките директори“.
„Турција, исто така, треба да биде поканета на сите состаноци на кои земјите кандидати се редовно поканети, како што се состаноците во Гимних и други“, додаде Кајмакчи.
Што се однесува до третата димензија, Кајмакчи рече дека е потребно ажурирање на Царинската унија за позитивна агенда меѓу Турција и ЕУ.
„Турција веќе ја спроведува трговската и конкурентска политика на ЕУ во согласност со Царинската унија меѓу Турција и ЕУ. Турција, во однос на трговијата, економијата и конкуренцијата, веќе може да се смета за членка на ЕУ. Ниту една друга земја кандидат нема Царинска унија со ЕУ“, рече тој.
Истакнувајќи дека сегашната Царинска унија треба да се ажурира, Кајмакчи рече дека ажурираната верзија „може да вклучува услуги, земјоделство, енергија и можеби други области. Бидејќи Турција и економиите на ЕУ се многу меѓусебно поврзани и меѓусебно зависни, модернизацијата на Царинска унија ќе создаде ситуација корисна за двете страни“.
Продолжувајќи со наведување на визната либерализација како четврта димензија, турскиот заменик-министер за надворешни работи потсети дека Турција и ЕУ се согласиле за исполнување на 72 критериуми потребни за дијалогот за визна либерализација.
„ЕУ и Турција се согласија дека кога Турција ќе исполни 72 критериуми за дијалогот за визна либерализација, турските граѓани ќе можат слободно да патуваат - тука не зборуваме за слободно движење на работната сила - во Шенген зоната. Ние работиме на исполнување на преостанатите неколку критериуми“, рече тој.
Понатаму, „антитероризмот е уште една важна димензија, бидејќи постои прашање на недоверба меѓу Турција и некои од западните земји“, нагласи тој.
„Кога гледаме терористички организации како ПКК како дејствуваат во европските престолнини, прават пропаганда, регрутираат луѓе, практикуваат перење пари или се вклучуваат во нарко-бизнисот, ние сме загрижени за сите нас и нашата заедничка иднина“, истакна Кајмакчи.
Тој истакна дека во борбата против тероризмот е потребна добра соработка против „сите терористички организации“ вклучувајќи ги ПКК, Ал Каеда, ДЕАШ и ФЕТО.
Кајмакчи го наведе прашањето за справување со миграцијата како последна димензија на односите меѓу Турција и ЕУ, при што потсети на големиот предизвик на нерегуларната миграција.
Велејќи дека Турција моментално е домаќин на „4,2 милиони луѓе, најголемата бегалска заедница во светот, од кои 3,7 милиони се Сиријци, а останатите се Азијци, главно од Авганистан, Бангладеш, Иран, Ирак, Шри Ланка и Африканци“, Кајмакчи истакна: „Ова е многу тежок товар што не можеме сами да го преземеме и очекуваме ЕУ да го сподели тоа со нас“.
„Имавме некаков договор со ЕУ поврзан со миграцијата. Во рамките на договорот дадовме две ветувања; спречување нерегуларни премини и враќање назад на луѓето од грчките острови кои извршиле нелегален премин. Ги одржавме нашите ветувања со преземање на сите луѓе вратени од Грција до февруари 2020 година и со спречување на повеќе од 2 милиони дополнителни бегалци кои инаку би можеле да заминат во други европски земји надвор од Турција“, додаде тој.
Истакнувајќи дека товарот на миграцијата досега Турција ја чинела повеќе од 40 милијарди евра, Кајмакчи рече: „Зборуваме за само 6 милијарди евра поддршка од ЕУ за Сиријците во Турција, а од овие 6 милијарди евра, само 4,2 милијарди евра се потрошено до денес. Текот на средствата е многу бавен, многу бирократски, иако тоа е најбрзиот механизам во системот на ЕУ“.
Тој истакна дека е потребен нов договор за миграција, додавајќи: „Поради пандемијата [на коронавирус], се очекува и милиони бегалци да се упатат кон Турција и остатокот од Европа. Мораме подобро да управуваме со ова. Нашиот нов договор за миграција мора да се фокусира на справување особено со ситуацијата во северна Сирија, што е исто така четврто ветување на ЕУ“.
На прашањето за поврзаноста помеѓу спортот и дипломатијата, Кајмакчи рече дека спортот е „од витално значење“ во односите меѓу Турција и ЕУ, додавајќи дека „некои Турци не сфаќаат колку се европски додека нивниот омилен тим не игра на Европското првенство“.
„Турските тимови кои играат во европските лиги во различни гранки, исто така, претставуваат важни компоненти на нашиот европски идентитет и припадноста на Европа“, рече тој.
„Да заклучиме, спортот и дипломатијата се вклопуваат заедно. И мислам дека спортската дипломатија е доста влијателна и навистина помага многу во однос на надминување на предрасудите, поврзување на народите и нациите и создавање здрава и стабилна средина“, додаде Кајмакчи, заменик-министерот за надворешни работи на Турција.
