Ердоган: Туркије нема аспирации на ниту едно камче на друга земја

ИСТАНБУЛ (АА) - Туркије нема очи „ни на камче од која било друга земја“, рече денес турскиот претседател Реџеп Таип Ердоган, јавува Анадолу.

Анкара се надева дека соседна Сирија ќе ги постигне мирот и спокојството по кои трага 13 години, рече Ердоган во своето обраќање на 8. Обласен конгрес на турската АК Партија во Газиантеп.

Тој истакна дека зголемените напади врз цивилите во сириски Идлиб се чини дека се „последната капка“ што ги поттикна последните случувања.

Турскиот претседател истакна дека Туркије не може да ги игнорира случувањата во Сирија, со која дели 910 километри граница.

Во Сирија има нова политичка и дипломатска реалност, рече Ердоган и додаде: „Сирија им припаѓа на Сиријците, со сите нејзини етнички и верски компоненти, како и деноминации.“

Анкара е свесна за желбата на сепаратистичко-терористичката организација да „се фати за трупот во поплавата“ во Сирија, рече тој, предупредувајќи дека Туркије нема да толерира никаков потег што ја загрозува националната безбедност.

Туркије сака да види Сирија во која различни идентитети живеат едни до други мирно, и се надева дека ќе види таква Сирија „во многу блиска иднина“, додаде Ердоган.

Тој нагласи дека најдобро за регионот би било доколку сите одговорни актери, вклучително и меѓународните организации, го поддржат територијалниот интегритет на Сирија.

Турскиот претседател нагласи дека Сирија виде доволно војна и дека сирискиот народ заслужува слобода, безбедност и мир во својата татковина.

Покрај тоа, тој истакна дека режимот во Дамаск не може да го сфати значењето на раката што Туркије ја подаде и што значеше тоа.

Во врска со бегалците во Туркије, која е домаќин на најголемиот број сириски бегалци во светот, Ердоган рече дека историјата ќе забележи дека Туркије успешно го поминала тестот на човештвото „и покрај сета контрапропаганда“.

Сирија е средиште на граѓанска војна од 2011 година, а судирите повторно се интензивираа од крајот на ноември кога антирежимските групи ја презедоа контролата врз Алепо. Потоа ја презедоа контролата врз цел Идлиб, а потоа и врз Хама.

Вчера опозициските групи ја презедоа контролата и во покраината Дера на границата со Јордан. Денес, локалните опозициски групи ја презедоа контролата во јужната покраина Сувејда и во Палмира кај Хомс.

Опозициската Сириска национална армија ја спроведе операцијата „Зора на слободата“ против терористичката организација ПКК/ЈПГ во округот Тел Рифат, ослободувајќи го подрачјето од терористичките елементи.