Ердоган: Двата земјотреса во февруари 2023-та предизвикаа финансиска загуба за Туркије од 104 милијарди долари

АНКАРА (АА) – „Катастрофата на векот“ директно предизвика финансиска загуба на Туркије од 104 милијарди долари, изјави денес турскиот претседател Реџеп Таип Ердоган во врска со двата земјотреси кои на 6 февруари 2023 година погодија делови на Туркије, јавува Анадолу.

„Катастрофата на векот“ предизвика сериозна директна финансиска загуба од 104 милијарди долари за нашата земја и индиректна загуба од 150 милијарди долари“, рече Ердоган за време на комеморативната програма по повод земјотресите во турската југоисточна област Адијаман.

„До крајот на годината ќе изградиме вкупно 453.000 станбени единици, и ќе се погрижиме ниту еден граѓанин да не остане без дом или работно место“, додаде тој.

„Во зоната на земјотресите презедовме огромни напори за обнова и препород во рок од само две години, размер со кој речиси ниту една земја во светот не можеше да се справи“, истакна тој.

Единаесет турски области, Адијаман, Дијарбакир, Елазиг, Хатај, Газиантеп, Кахраманмараш, Килис, Малатија, Османије и Шанлиурфа, беа погодени од земјотреси со магнитуда од 7,7 и 7,6 степени во февруари 2023 година.

Во земјотресите загинаа најмалку 53.537 луѓе, над 107.000 беа повредени, а големите потреси влијаеа на животите на над 14 милиони луѓе.