Во Анталија пристигна првата група туристи од Русија по укинувањето на ограничувањата на летовите поради Ковид-19

АНТАЛИЈА (АА) - Ограничувањето на летовите од Русија кон Турција поради епидемијата на Ковид-19, што започна на 15 април, заврши денеска. По пауза од 2 месеца, руските туристи повторно почнаа да пристигнуваат во Турција и Анталија, јавува Агенција Анадолија (АА).

Авионот на „Туркиш ерлајнс“ (ТХЈ), кој полета од аеродромот „Внукова“ во Москва, главниот град на Русија, слета на аеродромот во Анталија во 5:40 часот со 132 патници.

Туристичката група што се симна од авионот помина низ термалните камери и влезе на аеродромот. По пасошките контроли, туристите си го зедоа багажот во рамките на мерките за епидемијата, и со автобуси заминаа во хотелите каде што ќе престојуваат.

Во текот на денот, се очекува повеќе од 12.000 туристи да дојдат во Анталија со 44 авиони од Русија.

Еден од патниците, Олег Уванов, рече дека дошол на годишен одмор кај еден пријател што живее во Анталија.

Истакнувајќи дека е многу убаво да се биде во Турција по укинувањето на ограничувањата, Уванов рече: „Сакам да се одморам по целогодишниот умор, убаво да поминам и да се вратам.“

Александра Донскаја, исто така, наведе дека со нетрпение го чекале одморот и дека купиле авионски билети веднаш по укинувањето на ограничувањата.

Нагласувајќи дека многу ја сакаат Анталија и Турција, Донскаја рече дека е дојдена со своето семејство и дека сака да има убав одмор во топол град.

Викторина Зеиена исто така рече дека е многу среќна во Турција.