АНКАРА (АА) - Иако Туркије и Грција треба да решат долгогодишни прашања, одржувањето на сите канали отворени помага да се изгради поголема доверба и почит кон меѓусебните сензитивни прашања и виталните интереси, рече директорот на Одделот за комуникации при турското Претседателство, Фахретин Алтун, пренесува Анадолу.
„Треба да ги држиме сите канали отворени. Мора да разговараме едни со други, а не со трети страни за нас. Таквото заедничко разбирање би помогнало да се изгради поголема доверба и почит кон меѓусебните сензитивни прашања и витални интереси“, рече Алтун во интервју за грчкиот весник „Та неа“.
Тој додаде дека сè додека се има „поголема транспарентност, предвидливост и чувство за добрососедство“, двете земји ќе имаат доволно простор да ги решат своите разлики.
Нагласувајќи дека никој нема корист од тензиите, Алтун рече дека Туркије и Грција треба да се справат со долгогодишните прашања и дека повеќето од нив се меѓусебно поврзани и комплексни.
„Можеме да ги решиме во корист на идните генерации“, рече тој, додавајќи дека и двете земји им должат на идните генерации добрососедски односи какви што постоеја за време на Мустафа Кемал Ататурк, основачот на Република Туркије и Елефтериос Венизелос, кој служеше неколку мандати како грчки премиер во периодот на Ататурк.
„Соработката меѓу нив беше голем чекор кон иднината. Мора да продолжиме со овие чекори. Нашите земји се во ист [НАТО] сојуз и денес имаме многу подобри околности. А имаме и заеднички предизвици“, додаде тој.
Истакнувајќи дека за решавање на прашањата меѓу земјите се потребни меѓусебна доверба и напори, искрен и конструктивен дијалог и трпение, Алтун рече дека е важно да се избегне ескалирачка реторика.
„Политичарите треба да се воздржат од провокативни изјави кои привлекуваат медиумско внимание. Кога ги гледаме грчките медиуми, со жалење забележуваме дека сè уште има голем број написи и коментари за Туркије кои не ја одразуваат вистината и негативно влијаат на грчкото јавно мислење“, рече тој.
Јавното мислење е важно бидејќи ги ограничува носителите на одлуки, истакна Алтун, посочувајќи дека конструктивниот став на медиумите би се одразил позитивно кај јавното мислење, што за возврат ќе им ја даде на политичарите потребната слобода за унапредување на билатералните односи.
- Состанок на Советот за соработка на високо ниво -
Во врска со 5. Совет за соработка на високо ниво на двете земји, Алтун рече дека Советот ќе заседава на 7 декември во Атина за прв пат по седум години.
„Ова е значаен напредок со оглед на нашите тензични односи во последните години. Благодарение на солидарната дипломатија и зголемените контакти, влеговме во овој нов период во нашите односи и имаме волја да продолжиме со овој позитивен тренд. Двете земји треба да ја искористат оваа можност за изнаоѓање решенија за нашите долгогодишни прашања“, посочи тој.
Алтун истакна дека Советот е важен бидејќи покажува политичка волја за понатамошно унапредување на односите и дава многу позитивен сигнал за јавноста во двете земји.
Во тек се подготовки за постигнување што е можно поконкретен напредок за време на состанокот на Советот, додаде тој.
Во однос на нерегуларната миграција, Алтун рече: „Сметаме дека наш заеднички приоритет треба да биде ставање крај на загубата на животи во Егејското Море и на копно. Нашите надлежни власти сега работат на воспоставување ефикасни механизми за соработка“.
Додека траат овие активности за дијалогот, треба да се избегнуваат провокативни и контрапродуктивни изјави кои никому не му користат, додаде тој.
- „Советот за безбедност на ОН не успеа да ја заврши својата работа“ -
За тековниот израелско-палестински конфликт, Алтун рече дека од минатиот месец, пред очите на светот се одвива една од најголемите трагедии во поновата историја.
„Сите ние треба да дадеме сé од себе за да ја деескалираме ситуацијата со цел да се избегне прелевање. Но, Советот за безбедност на Обединетите нации (СБОН), кој е одговорен за одржување на мирот, не успеа да ја заврши својата работа“, рече тој.
Речиси 2,3 милиони Палестинци во Газа се лишени од храна, вода, електрична енергија, лекови и гориво, посочи Алтун, повеќе од еден милион се раселени низ Појасот Газа, додека постојана цел на Израел се невоени локации како што се станбени згради, болници, училишта, бегалски кампови и места за богослужба.
„Ова ја надмина самоодбраната и се претвори во колективно казнување на населението, што претставува јасно кршење на меѓународното право, односно и меѓународното хуманитарно право и човековите права“, додаде тој.
Повикувајќи ја меѓународната заедница да упати „правилни пораки“ до Израел, Алтун рече дека е време да се помогне во деескалација наместо да се провоцира понатамошна воена акција.
„Значи, прекинот на огнот е итна потреба. Обезбедувањето непречен и доволен доток на хуманитарната помош во Газа за цивилите е исто така задолжително“, додаде тој.
„Палестинско-израелскиот конфликт е прашање на правдата и совеста, и треба да биде над секојдневната политика“.
„Актуелната криза уште еднаш ни покажува дека без решавање на клучните причини за палестинско-израелското прашање нема да има траен мир“, додаде тој.
Траен мир на Блискиот Исток е можен само преку олицетворение на независна, суверена и географски напоредна држава Палестина од границите од 1967 година со Источен Ерусалим (Источен Кудс) како нејзин главен град, рече Алтун, нагласувајќи дека такво „решение, со гарантен механизам за неговото спроведување е потребно во моментов“.
Посочувајќи дека Туркије и Грција имаат различни перспективи не само за војната во Газа, туку и за многу прашања, Алтун рече дека овие разлики во мислењата сепак не ги спречиле земјите да започнат нова, позитивна фаза во билатералните односи.
„Не може да се очекува од две земји, па дури ни од соседни, да се усогласат за секое прашање од меѓународен интерес“, рече тој, нагласувајќи дека нивната заедничка цел како соседи и сојузници на НАТО, воопшто, треба да биде спречување и избегнување на кризи, и меѓу нив и во регионот и пошироко.
Израел минатиот месец започна масовна воена кампања против Појасот Газа по прекуграничниот напад на Хамас.
Оттогаш во израелските напади загинаа најмалку 14.854 Палестинци, од кои 6.150 деца и над 4.000 жени, според здравствените власти во енклавата.
Бројот на загинати во Израел, според официјалните бројки, изнесува 1.200.
