Турција го поздрави прекинот на огнот во Сирија и повика на трајно решение

АНКАРА (АА) - Турција го поздравува прекинот на огнот постигнат во Сирија вчера, изјави претседателот Реџеп Таип Ердоган, изразувајќи надеж дека тоа ќе доведе до трајно решение без натамошно крвопролевање, јавува Анадолу.

Во обраќањето пред неговата владејачка Партија за правда и развој (АК Партија) во Парламентот, Ердоган рече дека Анкара „од самиот почеток најсилно го бранеше“ зачувувањето на единствена сириска држава со целосен територијален интегритет и политичко единство.

Сириското Претседателство вчера објави дека постигнало разбирање со ЈПГ/СДФ, давајќи ѝ на терористичката организација четиридневен период да изработи план за практична интеграција на Хасека, во кој прекинот на огнот ќе остане на сила. ЈПГ/СДФ подоцна преку соопштение истакна дека е целосно посветена на прекинот на огнот.

Ердоган предупреди дека секој обид за прибегнување кон провокации во Сирија од овој момент натаму би било „еквивалентно на самоубиство“, нагласувајќи дека стабилноста мора да се одржи.

Тој нагласи дека целосната интеграција во Сирија „ќе донесе нова ера“, додавајќи дека придобивките од стабилноста најмногу ќе ги почувствуваат сириските Курди.

„Ние немаме интерес на територијата на која било земја и не се мешаме во внатрешните работи на ниедна земја, но нема да дозволиме интересите на нашата земја да бидат компромитирани“, рече Ердоган.

Турскиот претседател, исто така, истакна дека разговарал за низа прашања со американскиот претседател Доналд Трамп во телефонски разговор, вклучително и за прашања „што ќе придонесат за безбедноста на Сирија“, како што се заедничките напори за борба против ДЕАШ.