Турскиот претседател Ердоган ги повика туркиските држави да ја зајакнат улогата во регионалната безбедност

ИСТАНБУЛ (АА) - Турскиот претседател Реџеп Таип Ердоган денес ги повика туркиските држави да играат поактивна улога во одржувањето на стабилноста и безбедноста во регионот, јавува Анадолу.

„Веруваме дека туркискиот свет може да преземе поактивна улога во стабилноста и безбедноста на нашиот регион на многу начини“, рече Ердоган, зборувајќи на 12. самит на Организацијата на туркиски држави (OTS) во северниот азербејџански град Габала.

„Се соочуваме со меѓународен систем во кој Советот за безбедност на ОН останува рамнодушен кон многу прашања што ја повредуваат совеста на човештвото“, истакна тој, критикувајќи го меѓународниот систем.

Истакнувајќи ги случувањата во Сирија, турскиот претседател рече: „И покрај многуте предизвици, напредокот на сириската Влада во текот на изминатите девет месеци ни дава причина да гледаме кон иднината со надеж.“

„Туркиските држави мора да го унапредат својот ангажман со сириската Влада”, додаде Ердоган.

Во врска со Јужен Кавказ, Ердоган рече: „Ние не само што ги следиме случувањата, туку искрено ги поддржуваме чекорите преземени во регионот за воспоставување мир и стабилност.“

Тој ги осуди последните напади на Израел врз Катар, велејќи дека тие покажуваат дека најголемата закана за стабилноста на нивниот регион доаѓа од сегашното раководство на оваа земја.

Ердоган ги истакна културните иницијативи, велејќи: „Во врска со заедничката азбука, Турција го прави првиот чекор, објавувајќи дело за (светски познатиот киргистански автор) Чингиз Ајтматов и Огузнамех (легендарни записи за Туркијците Огузи) во заедничката азбука.“