ФИФА: САД, Канада и Мексико, домаќини на СП во 2026 година

МОСКВА (АА) - Светското фудбалско првенство во 2026 година ќе се одржи во три земји, САД, Канада и Мексико, јавува Anadolu Agency (AA).

Редовниот 68. Конгрес на Светската фудбалска организација (ФИФА) е одржан денес во Москва.

Конгресот во Москва започна со минута молчење за неодамна починатиот претседател на Фудбалскиот сојуз на Косово, Фадил Вокри.

На учесниците им се обрати и рускиот претседател Владимир Путин, кој истакна дека претстојното Светско првенство е можност и за зближување на луѓето и културите.

Раководството на ФИФА и челниците на фудбалските сојузи на сите членки и организациите се собраа во Експоцентарот и со гласање го избраа домаќинот на Светското првенство кое ќе се игра во 2026 година.

Во најтесен избор беа Мароко и САД, Канада и Мексико со заедничката кандидатура, а со 134 освоени гласови, од вкупно 200, трката ја добија трите американски земји.

Тоа ќе биде прв Мундијал на кој ќе настапуваат 48 репрезентации, а не 32 како што е случајот со СП кое започнува утре во Русија и она кое за четири години ќе се одржи во Катар.

Од вкупно 80 мечеви на Мундијалот во 2026 година, дури 60 ќе се играат на тлото на САД, додека Канада и Мексико ќе бидат домаќини на по десет натпревари.

Првенството ќе се игра на вкупно 17 стадиони.