Мексико по неуспехот да се пласира во осминафиналето од Светското првенство остана и без селекторот Мартино

ИСТАНБУЛ (АА) - Херардо Мартино, селекторот на фудбалската репрезентација на Мексико од 2019 година, ја напушти селекторската позиција по неуспехот Мексико да се пласира во осминафиналето на Светското првенство во фудбал во Катар, јавува Агенција Анадолија (АА).

„Јас сум главниот одговорен за скршеното срце што сите го делиме денеска. Ја преземам одговорноста за неуспехот на ова Светско првенство“, рече Мартино по натпреварот против Саудиска Арабија.

„Мојот договор заврши кога судијата го даде последниот свиреж. Нема што да правам повеќе“, рече тој на прес-конференцијата.

Мексико беше елиминирано од Светското првенство, и покрај победата над Саудиска Арабија со 2:1 во натпреварот од групата Ц.

Аргентина е на врвот од групата Ц со 6 бода, Полска и Мексико имаат по 4 бода, а Саудиска Арабија е на дното од групата со само 3 бода.

Но второпласираната Полска, исто така се пласира во следната фаза, надминувајќи го Мексико со гол разлика.

Ова е првпат мексиканската репрезентација да не успее да се пласира во осминафиналето на Светското првенство од 1978 година.