Ангеловски во пресрет на натпреварот со Словенија: Чувствуваме позитивна трема од присуството на навивачите на стадионот

СКОПЈЕ (АА) - Фудбалската репрезентација на Северна Македонија утре во Скопје ќе го одигра пријателскиот натпревар против Словенија во рамките на подготовките за Европското првенство ЕУРО 2020, натпревар кој е прв што ќе се одржи во присуство на навивачи, по забраната воведена како мерка за превенција на ширењето на новиот вид коронавирус (COVID-19), јавува Агенција Анадолија (AA).

Според владината одлука, за натпреварот што ќе се одигра утре со почеток во 18:00 часот, Националната арена „Тоше Проески“ ќе може да биде исполнета до 30 проценти од капацитетот.

На прес-конференцијата пред натпреварот, македонскиот селектор Игор Ангеловски рече дека е среќен што повторно ќе има навивачи на стадионот, додавајќи дека фудбалерите на репрезентацијата на Северна Македонија заслужуваат атмосфера поради успехот со квалификувањето на ЕУРО 2020.

„Фудбалот се игра за публика, и ние, искрено, чувствуваме позитивна трема и секако сакаме да биде исполнет до максимум, онолку колку е дозволено, така што навивачите, целата поддршка што ни ја даваа, а не можеа да дојдат на стадион, еве утре имаат можност да создадат атмосфера затоа што овие момци го заслужија тоа“, рече Ангеловски.

Говорејќи за натпреварот против Словенија, тој рече дека му придава големо значење, без оглед дали се работи за пријателски натпревар.

„Оние 11 играчи кои ќе излезат на теренот, тоа е првиот состав“, рече Ангеловски.

Тој потсети дека Северна Македонија и Словенија беа во иста група на квалификациите за Европското првенство, додавајќи дека Словенија е квалитетен претставник и дека ова ќе биде добар тест за Северна Македонија.

Запрашан за играчот од средниот ред Енис Барди, кој е позитивен на Ковид-19, Ангеловски рече дека Барди се чувствува добро и нема симптоми.

Тој истакна дека со нетрпение го очекуваат негативниот тест, со цел Барди да им се придружи на останатите играчи, надевајќи се дека тоа ќе се случи во наредните денови.

Покрај утрешниот пријателски натпревар против Словенија, репрезентацијата на Северна Македонија во рамките на подготовките за ЕУРО 2020 во петок ќе го одигра и натпреварот против Казахстан.

Фудбалската репрезентација на Северна Македонија за прв пат се квалификува во натпреварување на високо ниво. На ЕУРО 2020 таа е во групата Ц заедно со Австрија, Украина и Холандија. Северна Македонија ќе го одигра својот прв натпревар на ЕУРО 2020 против Австрија на 13 јуни.