Јужнокорејските истражители пред Претседателството, наидоа на отпор за приведување на претседателот Јун

ИСТАНБУЛ (АА) - Јужнокорејските истражители рано наутро по локално време ги забрзаа напорите за спроведување на налогот за приведување на отповиканиот претседател Јун Сук-јол, објави „Јонхап њуз“, пренесува Анадолу.

Околу 3.000 полицајци се распоредени за да обезбедат пристап до претседателската резиденција во Сеул за приведување на Јун, кој одбива да се предаде.

Сепак, претседателската служба за безбедност го блокираше извршувањето на налогот за приведување, а последните извештаи се дека отпорот на обезбедувањето продолжува.

Властите претходно не успеаја да го приведат Јун на 3 јануари поради безбедносната блокада, но сега е во тек голема операција.

Тензиите се големи, илјадници поддржувачи на Јун се собраа пред неговата резиденција, пратениците од Партијата Народна моќ формираа синџир за да го блокираат приведувањето. Тимот адвокати на Јун вели дека налогот за приведување е „невалиден“, претседателскиот тим за безбедност го блокира извршувањето на приведувањето.

Според проценките на полицијата, пред резиденцијата има околу 6.500 луѓе, додека претседателската служба за безбедност поставила дополнителни бариери со автобуси за блокирање на пристапот до резиденцијата.

Претходно во текот на денот, Уставниот суд го одржа првото рочиште за судењето за отповикување на Јун. Поранешниот претседател, сепак, не се појави, што доведе до одложување на рочиштето во рок од четири минути.

Јун се соочува со обвиненија за бунт и предавство поради неговото објавување воена состојба на 3 декември, која брзо беше поништена од Националното собрание.