Јужна Кореја: Илјадници луѓе ја посетија Сината куќа, отворена за јавноста по 74 години

СЕУЛ (АА) – Сината куќа, официјалната резиденција на претседателот на Јужна Кореја, ја посетија илјадници луѓе откако беше отворена за јавноста по 74 години, пренесува Агенција Анадолија (АА).

Една од првите активности на новиот претседател Јон Сук Јеол беше да се преместат претседателските канцеларии од Сината куќа и таа да се отвори за јавноста.

Палатата, која беше отворена за јавноста на 10 мај, на ден ја посетуваат приближно 39.000 луѓе.

Со цел да се отвори Сината куќа, едно од изборните ветувања на претседателот Јон, претседателските канцеларии беа преместени во кампусот на Министерството за одбрана, на околу 5 километри далечина.

Наведувајќи дека има за цел да изгради палата слична на Белата куќа во САД, Јон рече дека новите канцеларии ќе овозможат подобри можности за комуникација со јавноста.

Планот на Јон за преместување на палатата наиде на критики од аспект дека е избрзан и нереален.

Сината куќа беше отворена за јавноста на 10 мај, првиот ден откако Јон стапи на функцијата.