Јамајка официјално ја призна Палестина за држава

БОГОТА (АА) - Владата на Јамајка донесе одлука да ја признае Палестина како држава во екот на израелската војна во Појасот Газа и сѐ поголемата растечката хуманитарна криза на палестинската територија, пренесува Анадолу.

„Јамајка останува посветена на решението со две држави како единствена остварлива опција за решавање на долготрајниот израелско-палестински конфликт, гарантирајќи ја безбедноста на Израел и зачувување на достоинството и правата на Палестинците. Со признавањето на државата Палестина, Јамајка ја зајакнува својата посветеност за мирно решение“, рече министерката за надворешни работи и надворешна трговија, Камина Џонсон Смит.

Министерката додаде дека одлуката е донесена во согласност со силната посветеност на Јамајка на принципите од Повелбата на Обединетите нации, која има за цел да воспостави меѓусебно почитување и мирен соживот меѓу државите, како и да го признае правото на народите на самоопределување.

Џонсон Смит ја потврди поддршката на Јамајка за прекин на огнот, ослободување на затворениците и пристап до хуманитарна помош за луѓето во Појасот Газа.

„Јамајка продолжува да ги поддржува сите напори за деескалација и воспоставување траен мир во регионот, повикувајќи ги сите страни да ги разгледаат ужасните последици од понатамошниот конфликт и да се посветат на дипломатски решенија кои осигуруваат безбедност и суверенитет за сите“, рече Смит.

Палестина досега ја признаа 140 држави членки на Обединетите нации (ОН), од вкупно 193.

Минатиот месец Шпанија објави дека се договорила со Малта, Ирска и Словенија да ги преземе првите чекори кон признавање на палестинската државност на окупираниот Западен Брег и Појасот Газа.