Шпанскиот министер за надворешни работи: „Шпанија ќе продолжи да прави сѐ што е во нејзина моќ да ја поддржи Украина“

ЖЕНЕВА (АА) - Шпанскиот министер за надворешни работи Хозе Мануел Албарес денес изјави дека Шпанија „ќе продолжи да прави сѐ што е во нејзина моќ“ за да ја поддржи Украина во услови на тековната војна меѓу Киев и Москва, јавува Анадолу.

Избегнувајќи да каже дали земјата ќе испорача системи за противвоздушна одбрана „Патриот“ во Киев, Албарес, пред состанокот на Советот на министри за надворешни работи на ЕУ, за новинарите изјави: „Никогаш не сум бил голем љубител на објаснување, на давање премногу објаснувања за тоа што се случува, кога ќе се случи, каде ќе се случи“.

„Шпанија претходно обезбеди противвоздушна одбрана и сигурно ќе продолжи да прави сѐ што е во нејзина моќ за да можат Украинците да ја бранат својата слобода, својата демократија и сите оние невини цивили кои умираат како последица на бомбардирање секој ден“, вели тој.

Тој истакна дека Шпанија и нејзините сојузници се „многу добро свесни“ за потребата на Украина од противвоздушна одбрана.

Министерот рече дека тој и другите министри на денешниот состанок ќе разговараат за „најдобриот начин“ да се поддржи Украина во одбраната на нејзината слобода и демократија.