Шолц: Германската Влада ќе продолжи со дипломатските напори за спречување на регионална војна на Блискиот Исток

БЕРЛИН (АА) - Германскиот канцелар Олаф Шолц денес рече дека германската Влада ќе продолжи со дипломатските напори да спречи војната во Газа да се претвори во голем регионален конфликт, јавува Анадолу.

„Заедно со САД, нашите европски сојузници и нашите партнери во регионот, правиме сѐ што можеме дипломатски за да спречиме ова да се засили“, рече тој на воената конференција во Берлин.

Откако конфликтот меѓу Палестина и Израел ескалираше минатиот месец, Шолц постојано ги предупредуваше Иран и Хезболах да не интервенираат во конфликтот.

„Местото на Германија е на страната на Израел“, рече Шолц, додавајќи: „Ние ќе го поддржуваме Израел, секаде каде што е потребно, во остварувањето на правото на самоодбрана.“

Германската Влада вели дека носи историска одговорност за безбедноста на Израел поради нацистичкото минато на земјата и злосторствата извршени врз Евреите.

Германската министерка за надворешни работи, Аналена Баербок, денес ја започнува својата блискоисточна турнеја како дел од дипломатските напори на Берлин да ја запре натамошната ескалација на кризата.

„Министерката за надворешни работи Баербок планира да ги посети Обединетите Арапски Емирати, Саудиска Арабија и Израел“, се вели во соопштението на Министерството, без да се дадат дополнителни детали.

Конфликтот драматично ескалираше откако военото крило на Хамас изврши напад без преседан врз Израел на 7 октомври со истрелување илјадници ракети и испраќање стотици борци во израелските градови.

Израел одговори со непрекината кампања на воздушни и артилериски напади врз Газа, а неодамна ги прошири своите копнени операции за да го искорени Хамас. Цивилната инфраструктура, вклучително и болниците и бегалските кампови, исто така беа цел на израелските сили.

Според здравствените власти, досега загинати се најмалку 10.812 Палестинци, меѓу кои 4.412 деца и 2.918 жени.

Група експерти на ОН неодамна предупредија дека Палестинците се „пред сериозен ризик од геноцид“ бидејќи израелската Влада одржува целосна опсада на Појасот Газа.

Од ескалацијата на конфликтот, според израелските власти, речиси 1.600 Израелци се загинати, а над 5.400 се повредени во нападите на Хамас.