ИСТАНБУЛ (АА) – Високи претставници на Иран и САД денеска во Оман треба да се сретнат за да разговараат за нуклеарната програма на Техеран, во време на зголемени тензии и засилено присуство на американските воени сили, пренесува Анадолу.

Според извештајот на „Волстрит журнал“, се очекува во преговорите да учествува и шефот на Централната команда на САД (CENTCOM).

Вашингтон ги обновува дипломатските контакти со Техеран првпат од 12-дневната војна со Израел во јуни, која заврши со американски воздушни напади врз нуклеарни објекти, додека истовремено ја зголемува својата воздушна и морнаричка присутност во близина на Иран и предупредува на можни акции поради иранската нуклеарна програма.

Според извештајот на „Волстрит журнал“, во делегацијата ќе биде адмиралот Бред Купер, командант на американските сили на Блискиот Исток, иако официјално потврдување засега нема.

Иако претставниците на Министерството за одбрана обично не учествуваат во дипломатски разговори на високо ниво, Трамп претходно испраќаше високи воени лидери на преговори.

Иранската делегација ја предводи Абас Арагчи, придружуван од заменикот за политички прашања Маџид Тахт‑Раванчи, портпаролот на Министерството за надворешни работи Есмаил Багаеи, заменикот за економски прашања Хамид Ганбари и други ирански дипломати.

Американската страна ќе биде претставена од специјалниот пратеник за Блискиот Исток Стив Виткоф, како и советникот и зет на претседателот Доналд Трамп, Џаред Кушнер.