Ahmed Asmar
24 Март 2025•Ажурирај: 25 Март 2025
ЕРУСАЛИМ (АА) - Шефицата за надворешни работи Каја Калас денес изјави дека со пропаѓањето на договорот за прекин на огнот во Газа се предизвикани огромни човечки загуби, јавува Анадолу.
Говорејќи на прес-конференција во Ерусалим заедно со израелскиот министер за надворешни работи Гидеон Саар, Калас нагласи дека нејзината посета доаѓа во исклучително тежок момент поради обновените судири во регионот.
Таа повика на повторно воспоставување прекин на огнот, оценувајќи дека тоа е „единствен изводлив начин за запирање на страдањата на сите страни“.
„Насилството раѓа ново насилство“, рече Калас, истакнувајќи дека ескалацијата создава „неподнослива неизвесност“ за Израелците кои сè уште се заробени во Газа и нивните семејства, додека за палестинскиот народ носи „ужас и смрт“.
Според израелските процени, во Газа сѐ уште се држат 59 заложници, а најмалку 24 од нив се живи. Тие требаше да бидат ослободени според договорот за прекин на огнот што беше прекинат минатата недела кога израелскиот премиер Бенјамин Нетанјаху нареди воздушни напади врз Газа.
Израелската армија уби над 700 Палестинци и повреди повеќе од 1.000 лица од почетокот на ненадејната воздушна кампања на 18 март и покрај тоа што во јануари беше постигнат прекин на огнот.
Убиени се повеќе од 50.000 Палестинци, главно жени и деца, а над 113.000 се повредени во бруталната израелска воена офанзива врз Газа од октомври 2023 година.
По прекршувањето на прекинот на огнот, Израел објави дека ќе ги засили воените операции против Хамас, одбивајќи нови предлози за примирје.
Од друга страна, пак, Хамас го обвини Израел дека ги прекршил своите обврски пред посредничките земји и дека продолжува со геноцидот врз Палестинците во Газа.
Најновата израелска офанзива се случува во период на политички превирања, вклучително и контроверзното разрешување на директорот на Шин Бет, Ронен Бар, од страна на премиерот Бенјамин Нетанјаху.
