Четворица Палестинци загинаа во израелски воздушни напади во Газа

ГАЗА (АА) - Четворица Палестинци загинаа, а повеќемина се повредени во денешните израелски воздушни напади врз градот Газа, соопштија официјални претставници и извори, јавува Анадолу.

Медицински извор за Анадолу изјави дека тројца Палестинци се убиени, а повеќемина се повредени во воздушен напад врз стан во близина на џамијата Ал-Канц во населбата Ал-Римал, во западниот дел на градот Газа.

Според тимовите за цивилна одбрана, уште еден Палестинец е убиен, а неколку други се ранети во напад врз стан во населбата Ал-Зејтун, во источниот дел на градот Газа.

Во меѓувреме, Цивилната одбрана на Газа најави прекин на операциите на неколку противпожарни и спасувачки возила поради недостиг на залихи за нивно одржување и резервни делови.

Во соопштението, службата истакна дека израелските сили „го уништија најголемиот дел од опремата и резервните делови достапни на локалниот пазар, кои претходно ги задоволуваа минималните потреби за одржување на нашите возила.“

Цивилната одбрана ги повика меѓународните и регионалните хуманитарни организации итно да ги обезбедат залихите пред да прекинат сите операции.

Организацијата предупреди дека тоа може „да ја влоши кризата и значително да ја попречи способноста на нашите тимови да одговорат на повиците на граѓаните“.

Израелската армија уби над 46.000 Палестинци, главно жени и деца, во нападите во Газа кои започнаа по прекуграничниот упад на Хамас во октомври 2023 година.

Во ноември 2024 година, Меѓународниот кривичен суд издаде налози за апсење на израелскиот премиер Бенјамин Нетанјаху и неговиот поранешен министер за одбрана Јоав Галант за воени злосторства и злосторства против човештвото во Газа.

Израел се соочува и со случај за геноцид пред Меѓународниот суд на правдата за неговата војна против енклавата.