Чавушоглу: „Турција и Пакистан додатно ја унапредуваат соработката и јакнењето на билатералните врски"

ИСЛАМАБАД

Властите на Република Турција и Пакистан постигнаа договор за додатно интензивирање на билатералната соработка и спроведување на заедничка стратегија на меѓународно ниво кога се во прашање темите од заеднички интерес, јавува Агенција Анадолија (АА).

Таквиот договор е постигнат денеска на состанокот на шефот на пакистанската дипломатија, Шах Махмуд Курејши, со турскиот колега Мевлут Чавушоглу кој престојува во тридневна официјална посета на Исламабад.

Курејши и Чавушоглу ги поздравија актуелните добри билатерални односи меѓу Пакистан и Турција.

Пакистанскиот министер за надворешни работи ѝ се заблагодари на Турција за поддршката која ја пружа кога е во прашање заштитата на човекови права во Џаму и Кашмир, регионот кој го окупира Индија.

Курејши исто така на Чавушоглу му кажа дека Пакистан продолжува да дава придонес во процесот на воспоставување мир во Авганистан кој е средиште на судирите веќе 19 години.

Чавушоглу и Курејши изразија загриженост поради растечката исламофобија во светот и повикаа на создавање заедничка стратегија за заштита на исламот и неговите вредности.

Шефот на турската дипломатија, Чавушоглу, за време на посетата на Исламабад ќе присуствува и на вториот трилателарен состанок со шефовите за дипломатија на Пакистан и Азербејџан, а денеска во Пакистан допатува и азербејџанскиот министер Џејхун Бајрамов.

Првиот таков трилатерален состанок е одржан во 2017 година во Баку, а Бајрамов е прв шеф на азербејџанската дипломатија кој го посетува Пакистан по подолго од деценија.

Пакистанскиот претседател Ариф Алви го прими турскиот министер за надворешни работи, Чавушоглу, и во Исламабад го одликуваше со државен орден на Пакистан.

И премиерот на Пакистан, Имран Кан, денеска го прими Чавушоглу, а на тој состанок се зборуваше и за низа билатерални, регионални и глобални теми.