Чавушоглу за американските санкции: „Еднострана одлука и напад на суверените права на Турција“

АНКАРА

Министерот за надворешни работи на Република Турција, Мевлут Чавушоглу, изјави дека со унилатералното наметнување санкции, Соединетите Американски Држави (САД) вршат напади врз суверените права на Турција и другите земји, пренесува Агенција Анадолија (АА).

Чавушоглу во интервјуто за телевизијата „24ТВ“ порача дека нормализацијата на турско-американските односи е можна доколку САД ги исполнат очекувањата на Турција.

„Одлуката на САД за воведување санкции кон Турција е погрешен потег и од правен и од политички аспект“, рече турскиот шеф на дипломатијата, Чавушоглу.

Властите на САД во понеделникот со посредство на механизмот КААТСА воведоа одредени санкции кон Турција поради набавката на руските ракетни системи С-400.

Американските санкции се однесуваат на Дирекцијата за одбранбена индустрија на Турција, нејзиниот шеф Исмаил Демир и уште тројца други официјални претставници.

Откако не успеа да постигне договор за купување на американскиот одбранбен систем „Патриот“, Турција пред три години потпиша договор со Русија за купување на системот С-400.

Американските власти негодуваа поради турската набавка на руските системи и тврдат дека тие системи не се компатибилни со системот на НАТО, како и тоа дека отвораат можност за руска саботажа на американските воени авиони Ф-35.

Од друга страна, Турција порача дека системите С-400 нема ни да ги интегрира во НАТО-системите на оружје и дека тоа нема да претставува закана за нејзините сојузници.