Цивилна одбрана: Израел за 3 недели уби најмалку 1.000 луѓе во северниот дел на Газа

ГАЗА (АА) - Управата за Цивилна одбрана во Газа објави дека најмалку 1.000 Палестинци се убиени во нападите што израелската Армија ги изврши врз северниот дел на Појасот Газа во текот на три недели, јавува Анадолу.

Портпаролот на Управата за Цивилна одбрана, Махмуд Басал, ја објави бројката од најмалку 1.000 убиени Палестинци во последните три недели во напади извршени од страна на израелската армија.

Басал изјави дека најмалку 100.000 луѓе биле подложени на блокади и напади во Џабалија, Беит Ханун и Беит Лахија, а 100.000 луѓе биле раселени во градот Газа.

Тврдејќи дека израелската Армија го убила секој што се обидел да им достави помош на Палестинците во северниот дел на Газа, Басал тврди дека Израел го искористил молкот на меѓународната заедница за да спроведе политика на „етничко уништување“ во северниот дел на Газа.

Басал побара од меѓународните институции да преземат итни мерки за спас на Палестинците на северот на Газа.

Израелската Армија, која на 5 октомври изврши интензивни воздушни напади на северот на Газа, особено на бегалскиот камп Џабалија, на 6 октомври изврши копнен напад врз споменатите области.

Се верува дека овој чекор е преземен за да се евакуираат Палестинците од северниот дел на Газа и да се подготви областа за изградба на нелегални населби и населување на Израелците.

Портпаролот на израелската Армија, Авичај Адраи, на 7 октомври ги предупреди Палестинците во Беит Ханун, Џабалија и Беит Лахија во северниот дел на Појасот Газа да ја напуштат областа.