Хаменеи: Ханије настрада на иранска територија, должност ни е да ја одмаздиме неговата крв

ТЕХЕРАН (АА) - Врховниот лидер на Иран, ајатолахот Али Хаменеи, изјави дека чувствуваат одговорност за атентатот на шефот на Политичкото биро на Хамас, Исмаил Ханије, кој се случи во Иран и ја сметаат за своја должност одмаздата кон Израел за смртта на Ханије, јавува Анадолу.

„Злосторничкиот и терористички ционистички режим нѐ растажи со тоа што нашиот вреден гостин падна како шехид во нашата куќа, но во исто време си подготви за себе тешка казна“, порача Хаменеи.

Изразувајќи сочувство поради убиството на Ханије, кого го нарече „храбар водач“, Хаменеи додаде: „Изразувам сочувство до исламскиот уммет, фронтот на отпорот, храбрата и горда палестинска нација, а особено до семејството на шехидот Ханије.“

Палестинското движење Хамас потврди дека нивниот лидер е убиен утрово во воздушен напад во Техеран.

Хамас соопшти дека нападот во кој загина политичкиот лидер на движењето е извршен од страна на Израел.

Во соопштението се наведува дека Ханије престојувал во Техеран по повод церемонијата за инаугурација на новоизбраниот ирански претседател.

Иранската државна телевизија претходно јави дека лидерот на Хамас е убиен во терористички напад врз резиденцијата во која престојувал во главниот град на Иран.

Ханије беше избран за шеф на Политичкото биро на Хамас на 6 мај 2017 година на местото на Халид Мешал.