Хамас му ги предаде на Црвениот крст трите заробенички Израелки

АНКАРА (АА) – Хамас му ги предаде трите заложнички Израелки на Црвениот крст во Газа, пренесува Анадолу.

Палестинската група Хамас денес соопшти дека ќе ослободи три заробеници во првата фаза од договорот за прекин на огнот во Газа и размена на затвореници со Израел.

Според новинарот на Анадолу, Бригадите Касам, вооруженото крило на Хамас, почналe да ги предава трите заложнички Израелки на Меѓународниот комитет на Црвениот крст во градот Газа.

Голем број членови на Касам со возила се собраа во центарот на градот Газа за да ги предадат трите Израелки, се наведува во веста.

Веста ја потврдија израелскиот јавен сервис КАН и телевизискиот канал 12.

Договорот за прекин на огнот во Газа стапи на сила денес во 11.15 часот по локално време (10.15 според средноевропско време) по неколкучасовно одложување поради израелските обвинувања кон Хамас дека го одложува објавувањето на списокот на заробеници што треба да бидат ослободени.

Речиси 47.000 Палестинци се убиени, главно жени и деца, а над 110.700 се ранети во израелската геноцидна војна во Газа од 7 октомври 2023 година.

Во израелските напади исчезнаа повеќе од 11.000 луѓе, со широко распространето уништување и хуманитарна криза која ги однесе животите на многу постари луѓе и деца во една од најстрашните глобални хуманитарни катастрофи досега.

Во ноември, Меѓународниот кривичен суд издаде налози за приведување на израелскиот премиер Бенјамин Нетанјаху и поранешниот министер за одбрана Јоав Галант за воени злосторства и злосторства против човештвото во Газа.

Израел е обвинет за геноцид пред Меѓународниот суд на правдата поради неговата војна против енклавата.