Ikrame Imane Kouachi
27 Септември 2024•Ажурирај: 28 Септември 2024
ГАЗА (АА) - Лидерите на палестинското движење Хамас ги повикаа светските лидери да ја напуштат салата за време на денешното обраќање на израелскиот премиер Бенјамин Нетанјаху на Генералното собрание на Обединетите нации со цел да протестираат против израелските напади во Појасот Газа, јавува Анадолу.
„Напуштањето на салата е најмалку што може да се направи за да се изрази отфрлање и осуда на тековниот геноцид во Газа“, рече во изјавата еден од претставниците на Хамас, Изат ал Ришк.
Ришк го нарече Нетанјаху „мал Хитлер“, обвинувајќи го дека го организирал масовното убивање на палестинските цивили во Газа и Либан.
„Нетанјаху уби повеќе од 41.000 цивили, вклучувајќи 17.000 деца и околу 200 доенчиња во Газа“, рече Ришк, додавајќи дека израелските напади биле насочени и кон болници, џамии, цркви и кампови за раселените лица.
Тој додаде дека Нетанјаху го продолжува нападот со целосно непочитување на резолуцијата на Советот за безбедност на ОН која повикува на итен прекин на огнот и игнорирајќи ги наредбите на Меѓународниот суд на правдата.
„Овој човек треба да биде уапсен и да одговара за своите злосторства“, рече Ришк, повикувајќи ги светските лидери да го бојкотираат говорот и да не му даваат платформа на Нетанјаху.
Не почитувајќи ја резолуцијата на Советот за безбедност на ОН која повикува на итен прекин на огнот, Израел продолжи со бруталната офанзива врз Газа по прекуграничниот напад на палестинската група Хамас минатиот октомври.
Според локалните здравствени власти, оттогаш се убиени повеќе од 41.500 луѓе, повеќето жени и деца, а повеќе од 96.000 се повредени.
Како последица на израелските напади раселено е речиси целото население на територијата поради тековната блокада што доведе до сериозен недостиг на храна, чиста вода и лекови.
Израел, исто така, се соочува со обвинувања за геноцид пред Меѓународниот суд на правдата за неговите постапки во Газа.
