Францускиот министер Баро: Компаниите чие оружје се користело на Блискиот Исток нема да учествуваат на саемот Евронавал

АНКАРА (АА) - Израелските компании чија опрема не била користена во офанзивните дејства во Газа и Либан ќе можат да ги изложат своите производи на саемот Евронавал следниот месец, изјави францускиот министер за надворешни работи, пренесува Анадолу.

Поради несогласувањата меѓу лидерите на двете земји, Франција наводно им забранила на израелските компании да учествуваат на саемот за одбрана на Евронавал, објавија медиумите минатата недела.

„Никогаш не станало збор за забрана за присуство на израелски компании на саеми во Франција. Израелските компании, доколку сакаат, можат да присуствуваат на Евронавал“, изјави Жан-Ноел Баро пред пратениците во Националното собрание во вчера.

Баро истакна дека позицијата на Франција не може да се смета за „бојкот“ против израелските компании и ја повтори цврстата поддршка на Париз за Израел.

Тој, исто така, потсети дека Франција одлучила да продолжи со дозволата за извоз на компоненти за одбранбениот систем „Железна купола“.

Сепак, Баро додаде дека би било „некохерентно“ да се дозволи презентација на оружјето што се користи во Газа и Либан, кое предизвикува „неприфатлива“ штета врз цивилното население.

Франција повика на прекин на огнот во регионот, потсети Баро и додаде:

„Компаниите чија опрема не е користена во офанзивните дејства во Газа и Либан нормално ќе можат да имаат свој штанд на саемот“, објасни тој.

Минатата недела, извори кои побараа да останат анонимни, изјавија за „Политико“ и други медиуми дека израелски делегации ќе присуствуваат на Евронавал, но дека на израелските компании нема да им биде дозволено да ги изложуваат своите производи и опрема.

Забраната доаѓа во време на несогласувања меѓу францускиот претседател Емануел Макрон и израелскиот премиер Бенјамин Нетанјаху по неодамнешните израелски напади врз мировниците на Обединетите нации во Либан (УНИФИЛ). Неколку мировници беа повредени.

Претходно овој месец, Макрон повика на стопирање на испораката на оружје за Израел поради неговите операции во Газа и нагласи дека Франција не испраќа оружје во Израел за користење во Газа.

Макрон вчера на состанокот на Владата истакнал дека „Нетанјаху не смее да заборави дека неговата земја е создадена со одлука на ОН“, изјава што наиде на критики од израелскиот премиер.

На израелските компании, исто така, им беше забрането да учествуваат на Меѓународниот саем за одбрана и безбедност, познат и како Евросатори, што се одржа во Париз во јуни.

Израелската армија ја продолжи разорната офанзива врз Појасот Газа по прекуграничниот напад на палестинската група Хамас минатиот октомври, и покрај резолуцијата на Советот за безбедност на Обединетите нации со која се бара итен прекин на огнот.

Според локалните здравствени власти, оттогаш се убиени повеќе од 42.700 луѓе, главно жени и деца, а речиси 100.300 се повредени.

Израелската офанзива врз Газа го расели речиси целото население на енклавата, а тековната блокада доведе до сериозен недостиг на храна, чиста вода и лекови.

Израел се соочува со случај за геноцид пред Меѓународниот суд на правдата за неговите акции во Газа. Израел минатиот месец започна интензивни напади и врз соседен Либан и покрај предупредувањата дека со тоа се зголемува ризикот од поголема регионална војна.