Betül Yılmaz
27 Март 2025•Ажурирај: 28 Март 2025
ИСТАНБУЛ (АА) - Израелските сили секојдневно убиваат најмалку 103 Палестинци и рануваат 223 други во нападите врз Појасот Газа, соопшти денес организацијата за човекови права „Евромедитерански мониторинг за човековите права“, јавува Анадолу.
„Од 18 март, кога Израел ја обнови воената кампања врз Појасот Газа, бројот на жртви постојано расте, а условите за живот стануваат сè понеподносливи“, предупредува организацијата.
Израелската Армија започна ненадејна воздушна офанзива врз Појасот Газа на 18 март, во која се убиени 855 лица, а речиси 1.900 беа ранети, со што беше нарушен договорот за прекин на огнот и размена на затвореници од јануари.
Воените напади се одвиваат додека Тел Авив продолжува да ги затвора граничните премини на Газа, спречувајќи го влезот на хуманитарна помош и основни прехранбени продукти за 2,4 милиони жители.
„Израелската Армија продолжува да ги бомбардира домовите со нивните жители внатре, убивајќи голем број цивили“, стои во извештајот на организацијата.
„Ова е јасна компонента на систематската израелска политика која има за цел да ги убие Палестинците, да ги уништи нивните животи и да наметне ужасна реалност што го оневозможува преживувањето.
Дополнително, организацијата наведува дека Палестинците се убиени од израелските сили додека се обидувале да избегаат, а нивните тела останале на улиците.
„Околу 50.000 цивили се заглавени во мал географски простор во Рафа, додека околу нив се извршувани гранатирања, бомбардирања и воени операции. Во само една недела, над 200.000 Палестинци биле принудени да ги напуштат своите домови, а уште илјадници се подготвуваат да заминат барајќи привремено сместување. Во меѓувреме, основните услуги и безбедноста се недостапни низ Појасот“, се истакнува во извештајот.
Организацијата го осуди меѓународниот молк за насилството, нагласувајќи дека тоа му овозможува на Израел да продолжи со нападите врз палестинското население.
„Целосното непочитување на правилата на меѓународното право од страна на Израел - правила кои им даваат посебна заштита на седиштето на ОН и на вработените - само по себе е меѓународно злосторство од највисок калибар што треба веднаш да се реши.“
Организацијата ги повикува сите земји да ги исполнат своите законски обврски и „брзо да дејствуваат за да го запрат израелскиот геноцид во Газа“.
„Палестинските цивили таму мора да бидат заштитени на секој можен начин, блокадата мора целосно и веднаш да се укине, движењето на луѓе и стоки мора да биде непречено, сите премини мора да се отворат без произволни услови и мора да се преземат ефективни мерки за заштита на Палестинците од бавните убиства и плановите за принудно раселување на Израел и САД“, се наведува во извештајот.
Во бруталната офанзива на израелската војска врз Појасот Газа од октомври 2023 година убиени се речиси 50.200 Палестинци, главно жени и деца, а над 113.700 се повредени.
Во ноември минатата година Меѓународниот кривичен суд издаде налози за апсење на израелскиот премиер Бенјамин Нетанјаху и неговиот поранешен министер за одбрана Јоав Галант за воени злосторства и злосторства против човештвото во Газа.
Израел се соочува и со случај за геноцид пред Меѓународниот суд на правдата за неговите постапки во енклавата.
