Ekipa
06 Декември 2021•Ажурирај: 07 Декември 2021
ПАРИЗ (АА) - Првиот официјален собир во рамките на кампањата за претседател на францускиот екстремно-десничарски политички коментатор Ерик Земур заврши со насилство, кога неговите поддржувачи се судрија со активисти против расизмот, јавува Агенција Анадолија (АА).
Петмина активисти од невладината организација „SOS Racismeсе“ се повредени за време на судирот кој започна кога тие ги покажаа маиците на кои пишуваше „Не за расизмот“ и извикуваа слогани против расизмот на собирот одржан во општината Вилпент, во предградието Сена Сен Дени, северен Париз.
Организацијата соопшти дека нејзините активисти излегле на мирен протест, но наместо тоа биле пречекани со насилство и навреди.
На видеото кое кружи на социјалните мрежи се гледа како поддржувачи на Земур и припадници на неговото обезбедување насилно ги напаѓаат активистите, меѓу кои имаше и жени, фрлајќи столови и замавнувајќи насилно кон нив.
И Земур е нападнат додека се движел низ толпата кон бината за да го започне својот говор кога еден од присутните се обидел да го фати за врат. Полицијата го приведе мажот под обвинение за „насилство со умисла“ и уште 50 лица за нарушување на јавниот ред и мир, неовластено собирање и носење оружје, објави „BFMTV news“.
Земур, кој двапати беше обвинет од француските судови за поттикнување расна омраза, се бранеше дека тој и неговите поддржувачи „очигледно не се расисти“.
„Можеби сте слушнале дека сум фашист, дека сум расист, дека сум мизогинист“, рече тој пред насобраните, отфрлајќи ги обвиненијата против него како „смешни“. Обраќајќи им се на присутните, тој рече дека сè што сакаат е да го бранат нивното наследство, да ја бранат нивната земја.
Земур го откри името на неговото движење за кампањата „Повторно освојување“, чија цел е „повторно освојување“ на Франција. Тој тврди дека е „подготвен да раководи со земјата“, бидејќи неговата опсервација по неколкумесечно патување низ Франција ги потврдиле „двата страва што ги прогонуваат Французите: стравот од големото деградирање...и од големата замена“.
Познат по застапувањето на екстремно десничарската теорија за „големата замена“ и антиимигрантските ставови, тој вели дека ако дојде на власт ќе спроведе „нулта имиграциска политика“. Тој, исто така, рече дека би сакал Франција да излезе од воената алијанса на НАТО предводена од САД.
Земајќи пример од поранешниот американски претседател Доналд Трамп, Земур, инаку поранешен новинар и колумнист, ги нападна медиумите. Тој ги нарече новинарите „квалификувани пропагандисти“ и ги претстави припадниците на медиумите како непријатели на народот кои работат рака под рака со владејачката гарнитура.
„Ако ме мразат мене, тоа е затоа што те мразат тебе. Ако ме презираат, тоа е затоа што ве презираат вас“, рече тој.
„Моите противници ја сакаат мојата политичка смрт, новинарите ја сакаат мојата социјална смрт, а џихадистите ја сакаат мојата смрт по секоја цена“, додаде тој.
Неговиот говор и насилството на собирот беа осудувани преку политичките партии.
Изборите за претседател на Франција се закажани за април 2022 година.
