ЛУГАНСК (АА) - Источниот украински град Лисичанск, едно од најинтензивните жаришта на Руско-украинската војна, вчера се соочи со силно бомбардирање, јавува Агенција Анадолија (АА).
Лисичанск, во регионот на Луганск, претрпе голема штета од борбите.
Чад се издига од градот, кој се наоѓа на 600 километри од главниот град Киев.
Звуците на експлозии се слушаат насекаде околу Лисичанск, каде што последните неколку дена се случуваат судири во кои и двете страни користат артилерија.
Куќите и улиците се празни откако многу луѓе заминаа бидејќи нема гас, струја и вода во градот, кој е под интензивен оган.
- Евакуациите од регионот продолжуваат -
Цивилите кои сакаат да го напуштат регионот донесени се во Лисичанск со поддршка на украинските безбедносни сили а потоа се однесени во побезбедни градови со возила кои ги управуваат волонтери.
Татјана Удавенко (29) која е бремена, чека возило за да може да се евакуира од регионот со нејзината 8-годишна ќерка, за да можат да стигнат во градот Днипро.
Истакнувајќи дека сака да стигне до Днипро што е можно побрзо, Удавенко рече: „Јас сум во деветти месец. Ова дете само што не се родило. Може да се породам во кое било време. Многу е тешко да се чека.“
Сопругот на Удавенко, Витја Брасук, рече дека тие како семејство сакаат да заминат од регионот.
„Бидејќи сме млади, ќе се обидеме да започнеме нов живот. Всушност, колку долго ќе останеме, зависи од војната“, рече Брасук.
Нејзината ќерка Елена рече дека многу се плаши од војната.
„Јас сум второ одделение во училиште. Многу ми недостигаат училиштето и другарчињата. Сонувам војната брзо да заврши“, додаде таа.
Се гледа како чад се издига од Северодоњецк, кој е блиску до градот Лисичанск, и за кој се знае дека е полн со украински и руски војници вклучени во битки.
Бидејќи растојанието помеѓу двата града е многу мало, звуците од експлозиите и судирите во Северодоњецк можат да се слушнат од Лисичанск.
