Украински Генералштаб: Русија продолжува да се повлекува од подрачјето на Киев и Чернихив

КИЕВ (АА) - Украинскиот Генералштаб денеска соопшти дека Руската армија продолжува да се повлекува од регионите Киев и Чернихив, пренесува Агенција Анадолија (АА).

Генералштабот во објава на Фејсбук го оцени 34. ден од руско-украинската војна. Во соопштението се вели дека Руската армија не може да ја исполни задачата да го опсади Киев и дека најверојатно ќе ги концентрира своите трупи на истокот на земјата.

Се наведува дека Руската армија ги продолжила нападите во Доњецк и извршила воздушни и ракетни напади врз населените места Кремина и Мариупол. Исто така, истакна дека единиците на украинските одбранбени сили во близина на Степногорск, Орихив и Гуљајполе биле под артилериски оган.

Се наведува дека Руската армија се фокусирала на преземање контрола врз градовите Попасна и Рубижне во регионот Луганск и градот Мариупол.

Војната на Русија против Украина, која започна на 24 февруари, наиде на меѓународен гнев, при што Европската Унија, САД и Велика Британија, меѓу останатите, воведоа строги економски казни за Москва.

Стотици светски компании ја прекинаа работата во Русија.

Најмалку 1.179 цивили загинаа во Украина, а 1.860 се повредени, според проценките на ОН, кои истакнаа дека вистинската бројка е веројатно многу поголема.

Повеќе од 3,9 милиони Украинци, исто така, побегнале во неколку европски земји, а милиони се раселени во земјата, според Агенцијата за бегалци на ОН.