Украина: Од почетокот на војната загинаа околу 17.700 руски војници

КИЕВ (АА) - Околу 17.700 руски војници загинаа во Украина досега, соопшти денес украинската војска, пренесува Агенција Анадолија (АА).

Украинските сили уништија 143 руски авиони, 131 хеликоптер, 625 тенка, 1.751 оклопно возило, 85 беспилотни летала, 76 резервоари за гориво и 7 брода, според најновото соопштение на украинскиот Генералштаб.

„Најмалку 316 парчиња руско артилериско оружје, 96 системи за повеќекратни ракетни фрлачи и 54 системи за противвоздушна одбрана, исто така беа уништени“, се додава.

Војната на Русија во Украина, која започна на 24 февруари, наиде на остра меѓународна осуда, а ЕУ, САД и Велика Британија, меѓу останатите, воведоа строги финансиски санкции на Москва.

Досега во војната во Украина загинаа најмалку 1.232 цивили, а 1.935 лица се повредени.

Повеќе од 4 милиони Украинци ја напуштија земјата, а милиони се внатрешно раселени, според Агенцијата за бегалци на ОН.