Asiye Latife Yılmaz
05 Октомври 2025•Ажурирај: 07 Октомври 2025
ИСТАНБУЛ (АА) – Турција, Јордан, Обединетите Арапски Емирати, Индонезија, Пакистан, Саудиска Арабија, Катар и Египет денес ги поздравија чекорите на Хамас како одговор на предлогот на американскиот претседател Доналд Трамп за прекин на војната во Газа, изведстува Анадолу.
Во заедничко соопштение, министрите за надворешни работи на осумте земји ги поздравија „чекорите преземени од Хамас во врска со предлогот на американскиот претседател Доналд Трамп за прекин на војната во Газа, ослободување на сите заложници, живи или починати, и итно започнување преговори за механизмите за имплементација“.
Тие, исто така, го поздравија „повикот на Трамп до Израел веднаш да го запре бомбардирањето и да започне со спроведување на договорот за размена, изразувајќи благодарност за неговата посветеност на воспоставување мир во регионот“, соопшти турското Министерство за надворешни работи.
„Тие, исто така, потврдија дека ваквите случувања претставуваат вистинска можност за постигнување сеопфатен и одржлив прекин на огнот и решавање на критичните хуманитарни услови со кои се соочуваат луѓето во Појасот Газа“, се додава во соопштението.
Министрите за надворешни работи го поздравија и соопштението на Хамас за неговата подготвеност да ја предаде администрацијата на Газа на преоден палестински административен комитет од независни технократи.
Министрите ја нагласија потребата од „итно започнување преговори за договор за формирање механизми за спроведување на предлогот и опфаќање на сите негови аспекти“.
Тие ја потврдија својата посветеност на прекин на војната во Газа и постигнување сеопфатен мир.
Министрите ја нагласија поддршката за „неограничена хуманитарна помош, ослободување на заложниците, враќање на Палестинската самоуправа во Газа и обединети Газа и Западен Брег“, а воедно да се осигура „безбедносен механизам што ја гарантира безбедноста на сите страни“ и го отвора патот за праведно решение со две држави.
