Турција ангажира водечка американска адвокатска компанија во случајот со програмата Ф-35

АНКАРА

Дирекцијата за одбранбена индустрија на Турција (SSB) ангажира водечка американска адвокатска компанија за да добие стратешки совети за заштита на своите права во програмата за производство на борбените авиони Ф-35, јавува Агенција Анадолија (АА).

Неименуван извор за АА рече дека договорот го потпишале компаниите „SSTEK Defense Industry Technologies“, подружница на Дирекцијата за одбранбена индустрија на Турција (SSB), и компанијата „Arnold & Porter“ од Вашингтон.

Истиот извор рече дека договорот ги покрива правните совети за побарување на досегашните права на Турција, а не и советите поврзани со задржувањето на таа земја во програмата.

Турција од почетокот е вклучена во американската програма за производство на борбените авиони Ф-35, а челниците на САД во 2019 година соопштија дека ќе ја исклучат Турција од програмата поради нејзиното купување на рускиот ракетен одбранбен систем С-400.

Официјален Вашингтон тврди дека турското купување на системот С-400 може да ја компромитира сигурноста на леталото Ф-35, а Турција порачува дека тие тврдења се неосновани и предлага формирање независна комисија што ќе го разјасни тоа прашање.

Челникот на Дирекцијата за одбранбена индустрија на Турција (SSB), Исмаил Демир, оцени дека исклучувањето на Турција од програмата Ф-35 претставува едностран и незаконски потег и порача дека таа земја ќе преземе потребни чекори да ги заштити своите права.