Трамп предлага преселување на Палестинците надвор од Газа

ВАШИНГТОН (АА) - Американскиот претседател Доналд Трамп предложи преселување на Палестинците од Газа во соседните земји како Египет и Јордан, необичен предлог на кој се противеше поранешната администрација на Џо Бајден, јавува Анадолу.

Говорејќи за новинарите пред неговото заминување од Лос Анџелес за Мајами, Трамп рече дека го покренал тоа прашање за време на телефонскиот разговор со јорданскиот крал Абдула Втори, а можно за тоа да разговара и со египетскиот претседател Абдел-Фатах ал-Сиси денес.

„Му реков (на јорданскиот крал) дека би сакал да преземат повеќе затоа што во моментов го гледам целиот Појас Газа и тоа е хаос, тоа е вистински хаос“, рече Трамп. „Би сакал тој (јорданскиот крал) да ги земе луѓето“.

„Би сакал Египет да земе луѓе (Палестинци). Разговарам со генералот Ал Сиси. Би сакал Египет да земе луѓе. И би сакал Јордан да земе луѓе“, продолжи Трамп.

„Зборувате за милион и пол луѓе, и ние само ќе ја исчистиме целата работа. Знаете низ вековите имало многу, многу конфликти. И не знам, нешто мора да се случи“, додаде тој.

Опишувајќи ја Газа како „разрушено место“, американскиот претседател рече: „Речиси сè е уништено и таму умираат луѓе. Затоа, повеќе би сакал да се вклучам заедно со некои од арапските земји и да изградам домови на друга локација каде што можеби ќе живеат во мир за промена“.

Тој додаде дека потегот „може да биде привремен или долгорочен“.

Администрацијата на Бајден се противеше на преселувањето на жителите на Газа надвор од енклавата, заговарајќи враќање на жителите на Газа во нивните домови со потенцијалниот мир и дводржавното решение.

Во израелската геноцидна војна од 7 октомври 2023 година убиени се над 47.000 Палестинци, повеќето жени и деца, а повредени се над 111.000.