Трамп потпиша указ за замрзнување на целиот имот на Венецуела во САД

ВАШИНГТОН (АА) - Американскиот претседател Доналд Трамп потпиша претседателски указ за замрзнување на целиот имот на Венецуела во Соединетите Американски Држави (САД), пренесува Anadolu Agency (AA).

САД не го сметаат за легитимен претседателот на Венецуела, Николас Мадуро и неговата администрација поради што е преземен нов чекор насочен кон зголемување на притисокот врз Мадуро.

Белата куќа со јавноста го сподели претседателскиот указ за Венецуела, потпишан од претседателот Трамп.

Во указот насловен „Замрзнување на имотот на Венецуела“ се вели: „Целиот имот на Венецуела во Соединетите Амерокански Држави е замрзнат, тој не може да се трансферира, извезува, повлекува или [со него да се] тргува.“

Со овој чекор администрацијата на Трамп планира да спроведе економска блокада на Венецуела.

Од друга страна, со истиот указ ограничени се сите трансакции со сите венецуелски власти, освен трансакциите за хуманитарната помош.

Минатата недела американскиот претседател Трамп изјави дека е можно да ја блокира Венецуела.

Американската администрација дава отворена поддршка на опозицијата предводена од Хуан Гваидо, претседател на Националното собрание, кој се прогласи за привремен претседател на државата. За администрацијата, венецуелскиот претседател Николас Мадуро не е легитимен.

САД многупати ѝ се заканија на Венецуела со воена интервенција. Венецуела ја претрпува најсериозната политичка криза во својата историја.