Трамп организираше ифтар во Белата куќа

ВАШИНГТОН (АА) - Американскиот претседател Доналд Трамп вчера организираше ифтар во Белата куќа по повод месецот на постот, Рамазан, јавува Anadolu Agency (AA).

На ифтарот присуствуваа амбасадори, меѓу кои и турскиот амбасадор Сердар Килич, членови на дипломатскиот кор кои претставуваат нации со голема муслиманска популација, и други гости.

„Рамазан е свет месец за муслиманите, тука во САД, но и низ светот“, изјави Трамп.

Муслиманите низ целиот свет постат од зори до зајдисонце за време на овој месец. Постењето е еден од петте столба на исламот.

„Рамазан е време кога луѓето ги здружуваат силите во потрага по надеж, толеранција и мир“, изјави Трамп.

Американскиот претседател, исто така, се присети на неодамнешните напади врз местата за богослужба, наведувајќи ги нападите на џамијата во Нов Зеланд, нападите врз христијаните во Шри Ланка и нападите на синагогата во Питсбург и во Калифорнија.

„За благословено сеќавање на нив, решивме да го победиме злото на тероризмот и религиското прогонство, така што сите луѓе ќе можат да се поклонат без страв, да се молат без опасност и да живеат со религијата што тече низ нивното срце“, рече Трамп.

Тој во завршницата на својот говор им го честита месецот Рамазан на сите муслимани низ светот.