Белата куќа: „Трамп го предупреди Лавров, Русија да не се меша во изборите на САД"

ВАШИНГТОН (АА) - Американскиот претседател, Доналд Трамп, го предупреди рускиот министер за надворешни работи против каков било напор на Русија да се меша во изборите на САД, соопштува Белата куќа, пренесува Агенција Анадолија (АА).

„За време на состанокот зад затворени врати со Сергеј Лавров во Овалната канцеларија, Трамп исто така ја повика Москва да го реши конфликтот со Украина, осврнувајќи се на немирите во источниот дел на земјата“, се вели во соопштението на Белата куќа.

Русија и Украина не се во добри односи од 2014 година, кога Русија го анектираше Кримскиот Полуостров на Украина по спорниот референдум.

Трамп, исто така, објави фотографија од него и Лавров на Твитер, велејќи дека имал многу добар состанок со рускиот дипломат и претставниците на земјата.

„Дискутиравме за многу работи, вклучувајќи ги трговијата, Иран, Северна Кореја, ИНФ-договорот, контролата на нуклеарното оружје и мешањето во изборите. Со нетрпение очекуваме да продолжиме со нашиот дијалог во блиска иднина!“, напиша тој на Твитер.

„Државниот секретар, Мајк Помпео, и Лавров го информираа Трамп за нивните дискусии во врска со билатералниот однос меѓу двете земји“, се вели во соопштението.

Претходно истиот ден, Помпео, исто така, го предупреди Лавров за понатамошното мешање во претседателските избори следната година, велејќи дека тој за време на нивната билатерална средба јасно кажал кои се очекувањата на Вашингтон од Русија.

„Доколку Русија или некој странски актер преземат чекори за да ги поткопаат нашите демократски процеси, ние ќе преземеме акција како одговор на тоа“, рече Помпео.

За време на средбата, Трамп ја истакна и својата поддршка за ефективна глобална контрола на оружјето, во која се вклучени и Русија и Кина.

Трамп, исто така, ја повика Москва да го поддржи Вашингтон „за да го спречи Иран да развива нуклеарно оружје и да обезбеди уништување на Северна Кореја“.

Тие ја разгледаа и состојбата на односите со Пекинг.

„Претседателот ја потврди потребата за фер и реципрочна трговија со Кина. Претседателот истакна дека подобрите односи со Русија ќе овозможат зголемена трговија меѓу нивните земји“, се заклучува во соопштението.