Трамп најави формирање на работна група за заштита на христијаните и Канцеларијата на Белата куќа за верата

ВАШИНГТОН (АА) - Американскиот претседател Доналд Трамп денеска објави дека ќе потпише извршна наредба со која новата државна обвинителка Пем Бонди ќе ја назначи на чело на работната група „за искоренување на антихристијанската пристрасност“, јавува Анадолу.

„Мисијата на оваа работна група ќе биде веднаш да ги запре сите форми на антихристијански напади и дискриминација во рамките на федералната влада, вклучително и Министерството за правда, коешто беше апсолутно ужасно“, рече Трамп на националниот молитвен појадок во Вашингтон.

Тој рече дека ќе формира „сосема нова“ претседателска комисија за верски слободи.

Покрај тоа, Трамп најави дека ќе основа Канцеларија на Белата куќа за верата која ќе ја води Пола Вајт, христијанска телеевангелистка која беше советник во претседателската кампања на Трамп во 2016 година.

„Сакам да ја вратам религијата. Мора да ја имаме, а таа многу страдаше во последните неколку години. Но, таа се враќа“, порача Трамп.