Davit Kachkachishvili
07 Февруари 2025•Ажурирај: 07 Февруари 2025
Зеленски во писмено соопштение на својот профил на Телеграм, наведе дека ја примил претседателката на Европската банка за обнова и развој (ЕБОР), Одил Рено-Басо, која престојува во неговата земја, известува Анадолу.
Зеленски наведе дека за време на билатералната средба одржана во претседателскиот кабинет се разговарало за прашањата за обезбедување помош на луѓето погодени од војната во Украина од страна на ЕБОР, додавајќи дека ‘станало збор за проширување на помошта, зголемување на директните инвестиции во приватниот сектор и соработка во банкарскиот сектор’.
По билатералната средба, Зеленски на прес-конференција со Одил Рено-Басо ги оцени последните случувања во врска со тековната војна во неговата земја.
На прашањето дали постои можност за средба со рускиот претседател Путин за да се стави крај на војната, Зеленски одговори:
„Се разбира, и САД и претседателот (Доналд) Трамп и земјите од ЕУ веруваат дека дипломатијата не е можна без Русија, без Путин. Затоа реков дека сум подготвен (да се сретнам со Путин) ако можеме да се договориме како оваа војна ќе заврши за нас. Подготвени сме за дипломатија, тука не постои проблем во врска со тоа. Проблемот е што ми се чини дека Путин, во принцип, се плаши да разговара со мене за завршување на војната.“
„Но, сепак мислам дека Трамп може да го натера да ја заврши војната“, наведе Зеленски во објавата на Телеграм.
- „Уверен сум дека тимовите на САД и Украина ќе работат заедно“
Осврнувајќи се на неодамнешната појава на информации во некои медиуми кои тврдат дека се ‘план на Трамп’ за завршување на руско-украинската војна, Зеленски го даде следниот коментар:
„Сигурен сум дека нашите тимови (САД-Украина) ќе работат заедно. Не може да има поинаков план“.
Зеленски потсети дека претходно ги споделил сопствените ставови за завршување на војната со Трамп, додавајќи:
„Сепак, ќе работиме за да бидеме сигурни дека ова е заедничко разбирање и визија. Дури и ако нешто не ѝ се допаѓа на Русија, потребна ни е заедничка визија меѓу партнерите. Тогаш сме подготвени за дипломатија“.
Осврнувајќи се и на тврдењата дека планот за завршување на војната дошол од Кит Келог, кого Трамп го назначи за специјален претставник за Украина и Русија, Зеленски истакна: „Ќе ги чекаме официјалните преговори и резултати“.
- ЕБОР ќе продолжи да го поддржува енергетскиот сектор на Украина
Претседателката на ЕБОР, Рено-Басо, изјави дека од почетокот на војната, на Украина ѝ дале поддршка во вредност од 6,2 милијарди евра, вклучувајќи и 2,4 милијарди евра што ѝ ги доделиле минатата година.
Рено-Басо рече дека ќе продолжат да произведуваат проекти во енергетскиот сектор на Украина и ќе го поддржуваат приватниот сектор.
