ВАШИНГТОН (АА) – Американскиот претседател Доналд Трамп изјави дека Иран се обидел повторно да ја активира својата нуклеарна програма по американските воздушни напади извршени минатото лето, пренесува Анадолу.

„Се обидоа да се вратат на локацијата. Не можеа ни да ѝ се приближат, беше целосно уништена“, изјави Трамп во интервју за „Ен-би-си њуз“.

„Но, размислуваа да започнат со нова локација во друг дел од земјата. Ние дознавме за тоа. Им реков: ‘Ако го направите тоа, ќе ви направиме многу лоши работи.’“

Изјавите доаѓаат во време кога Иран и САД се подготвуваат за преговори за нуклеарната програма на Техеран, што треба да се одржат утре (петок) во главниот град на Оман, Мускат.

Преговорите претходно беа доведени во прашање, но официјален претставник на Белата куќа за Анадолу потврди дека тие сепак ќе се одржат.

Иран исто така потврди дека разговорите ќе продолжат, при што министерот за надворешни работи Абас Арагчи изјави дека тие ќе започнат утре изутрина.

Американската новинска веб-страница „Аксиос“ претходно објави дека Вашингтон му соопштил на Техеран дека нема да прифати барања за промена на локацијата или форматот на разговорите.

„Им рековме: или вака или ништо, а тие рекоа: ‘Во тој случај – ништо’“, беше цитиран американски официјален претставник од страна на Аксиос.

Претходно, иранските медиуми објавија дека двете земји треба да одржат индиректни преговори во Мускат, фокусирани на нуклеарните прашања.

Пред Мускат, како можна локација беше предложен и Истанбул, по успешната улога на Турција во намалувањето на тензиите меѓу двете земји.

Аксиос, повикувајќи се на истиот извор, наведува дека доколку Иран е подготвен да се врати на првично договорениот формат, САД се подготвени за средба уште оваа или следната недела.

Во меѓувреме, полуофицијалната иранска агенција „Мехр“ цитираше извор кој тврди дека Вашингтон се обидува да „подигне прашања надвор од нуклеарната рамка, вклучувајќи и одбранбени прашања“.

„Овие барања не се поврзани со нуклеарното досие, туку директно се однесуваат на националната безбедност и одбранбените капацитети на земјата и се целосно неприфатливи за преговори“, изјави изворот.

Тој додаде дека Иран е „подготвен за разговори во јасно дефинирана рамка, заснована на меѓусебна почит“, но предупреди дека „прекумерните барања и проширувањето на темите“ може да доведат до застој.

Оман и претходно посредуваше во индиректните контакти меѓу Вашингтон и Техеран.

Планираните преговори се одржуваат во услови на зголемени тензии, поттикнати од американското воено засилување во Персискиот Залив и честите закани за воена акција од страна на Трамп.

Во последните денови, повеќе земји понудија посредништво за намалување на тензиите, при што Турција има особено активна улога.

САД и нивниот сојузник Израел го обвинуваат Иран дека се обидува да развие нуклеарно оружје, додека Техеран тврди дека неговата нуклеарна програма има исклучиво мирољубиви цели, вклучително и производство на електрична енергија.