Трамп вети дека ќе ги отвори досиејата поврзани со атентатите на Џон Ф. Кенеди и Мартин Лутер Кинг Џуниор

ИСТАНБУЛ (АА) – Идниот претседател на Соединетите Американски Држави (САД), Доналд Трамп, синоќа вети дека ќе ги отвори за јавноста досиејата поврзани со атентатите на поранешниот претседател Џон Ф. Кенеди и активистот за граѓански права, д-р Мартин Лутер Кинг Џуниор, јавува Анадолу.

„Како прв чекор кон враќање на транспарентноста и одговорноста во Владата, ќе ја прекинеме прекумерната класификација на владините документи“, изјави Трамп пред своите поддржувачи во арената „Капитал Ван“ во Вашингтон.

„Во наредните денови ќе ги објавиме преостанатите документи поврзани со атентатите на претседателот Џон Ф. Кенеди, неговиот брат Роберт Кенеди, како и д-р Мартин Лутер Кинг Џуниор“, додаде тој.

Трамп претходно исто така повика на целосна декласификација на информациите поврзани со атентатот на Кенеди, што се случи во 1963 година.

Во неделното обраќање, тој ја повтори оваа заложба, истакнувајќи дека ќе го исполни ветувањето веднаш по преземањето на функцијата.

И Роберт Кенеди и Мартин Лутер Кинг Џуниор беа убиени во 1968 година.

Трамп формално ќе положи заклетва како претседател денес претпладне, а веднаш потоа се очекува да потпише голем број извршни наредби кои веќе се подготвени.