Таксистите во Атина започнаа 48-часовен штрајк поради незадоволство од владините политики

АТИНА (АА) - Таксистите во Атина, Грција, започнаа 48-часовен штрајк, изразувајќи незадоволство од нерешените проблеми во индустријата и повикувајќи на итна интервенција на Владата, јавува Анадолу.

Штрајкот е организиран од Синдикатот на таксисти во регионот Атика, кој соопшти дека ваквиот потег следува по долг период на игнорирање од заменик-министерот за транспорт Костантинос Киранакис, кој не одговорил на нивните барања за дијалог.

Клучните барања на синдикатот опфаќаат повлекување на најавената политика според која сите нови такси-возила регистрирани по 1 јануари 2026 година мора да бидат со нулта емисија.

Дополнително, синдикатот бара построга контрола и казни за нелегалните „пиратски“ таксисти, субвенции за гориво и зголемување на тарифите во согласност со неодамнешното покачување на минималната плата.