НАБЛУС (АА) - Стотици Палестинци во градот Наблус на Западниот Брег денес се простија од турско-американската активистка Ајшенур Езги Ејги, која беше убиена од израелските сили во петокот, јавува Анадолу.
Погребната поворка започна од владината болница „Рафидија“ во Наблус, движејќи се низ неколку улици, каде присутните извикуваа слогани со кои се осудуваат израелските дејствија, јави новинарот на Анадолу.
Ожалостените ја извршија погребната молитва, предводена од гувернерот на Наблус, Гасан Дагхлас, со учество на лидери на различни палестински фракции и голем одѕив на јавноста.
Телото беше завиткано во палестинското знаме, а главата беше покриена со традиционалната палестинска кефија.
Се очекува телото на Ејги да биде донесено во Туркије.
Ејги (26), двојна државјанка на Туркије и на Соединетите Американски Држави (САД), беше застрелана од израелските сили за време на протестот во петокот против илегалните еврејски населби во градот Беита, на окупираниот Западен Брег.
Портпаролот на турското Министерство за надворешни работи, Онџу Кечели, денес објави дека Туркије работи на олеснување на процедурата за предавањет на телото на Ејги.
„Продолжуваме со потребната работа за да го предадеме телото на нашата државјанка Ајшенур Езги Ејги, која беше убиена од израелските војници на Западниот Брег, на нејзиното семејство за погреб“, напиша Кечели на социјалната мрежа X.
Израелската армија допрва треба да ги коментира спецификите на инцидентот и наодите од обдукцијата.
Со убиството на Ејги се повторува случајот на американско-палестинската новинарка Ширин Абу Аклех, која беше убиена на сличен начин во 2022 година.
