Столтенберг: Членките на НАТО не ѝ даваат доволно муниција на Украина

БРИСЕЛ (АА) - Членките на НАТО не ѝ даваат доволно муниција на Украина, изјави денес генералниот секретар на НАТО, Јенс Столтенберг, јавува Анадолу.

Столтенберг на прес-конференцијата во Брисел го претстави годишниот извештај на НАТО за 2023 година и ја коментираше ситуацијата во Украина, каде што Русија пред две години спроведува специјална воена операција.

Тој изјави дека на Украинците не им недостига храброст, туку муниција.

„Сојузниците на НАТО не обезбедуваат доволно муниција за Украина и од тоа има последици на бојното поле секој ден. Факт е дека Русите умеат да се надигруваат со Украинците секој ден. Се разбира, тоа е голем предизвик, тоа е една од причините зошто Русите успеаја да постигнат одреден напредок на бојното поле во последните недели и месеци“, изјави Столтенберг.

Тој ги повика сојузниците да обезбедат повеќе муниција за Украина.

„И САД и Канада и Европа мора да направат повеќе“, рече Столтенберг, нагласувајќи дека членките на НАТО имаат „економии што можат да ѝ го дадат на Украина тоа што ѝ е потребно“.

Тој нагласи дека е прашање на политичка волја за донесување одлуки и приоритет за поддршка на Украина.

„И затоа ни се потребни одлуки за да инвестираме повеќе во одбранбената индустрија“, додаде генералниот секретар на воената алијанса.

Столтенберг рече дека би било голема историска грешка да се дозволи победа на рускиот претседател Владимир Путин.

„Не можеме да дозволиме авторитарни лидери да користат сила. Ова би било опасно за сите нас“, предупреди тој.

- Финска стана побезбедна -

Столтенберг рече дека Финска влегла во НАТО во 2023 година и станала побезбедна од порано.

Тој истакна дека речиси сите руски копнени сили биле распоредени против Украина.

„Значи, не гледаме никаква непосредна закана за ниту еден сојузник во НАТО“, рече Столтенберг, ветувајќи дека ќе ја следи ситуацијата и ќе ги заштити сојузниците.

- Избори во Русија -

На прашањето за внатрешната ситуација во Русија, во пресрет на претседателските избори што ќе се одржат од 15 до 17 март, Столтенберг рече дека во земјата нема демократија и дека опозицијата е потисната.

„Претседателот Путин со децении ја држи власта во Русија. И никој не очекува руските избори оваа недела да донесат некаква промена во Кремљ. И, се разбира, обидите на Русија да организира кој било дел од изборите во окупираните региони на Украина се целосно нелегални и претставуваат кршење на меѓународното право“, додаде генералниот секретар на НАТО.